सर्पदंश र रेबिजको उपचारका अत्यावश्यक औषधि नेपाल आइपुग्यो

काठमाडौं । केही समयदेखि अभाव रहेको सर्पदंश र रेबिजको उपचारमा प्रयोग हुने अत्यावश्यक औषधि नेपाल आइपुगेको छ। स्वास्थ्य मन्त्रालयका अनुसार सर्पको विषविरुद्ध प्रयोग हुने ८ हजार २ सय भायल एन्टी स्नेक भेनम र रेबिजको उपचारमा प्रयोग हुने १७ हजार ६ सय भायल रेबिज इम्युनोग्लोबुलिन ल्याइएको हो। यी औषधि टेकुस्थित केन्द्रीय भ्याक्सिन स्टोरमा राखिएको छ।

आवश्यक प्रक्रिया पूरा गरेपछि सातै प्रदेशका स्वास्थ्य आपूर्ति केन्द्रमार्फत सम्बन्धित अस्पताल र स्वास्थ्य संस्थामा पठाइनेछ। स्वास्थ्य सेवा विभागका निमित्त महानिर्देशक डा. अनुज भट्टचनले औषधि आएपछि सर्पदंश र रेबिजको जोखिममा रहेका बिरामीलाई उपचार गर्न सहज हुने बताए। यसअघि विभिन्न सरकारी स्वास्थ्य संस्थामा यी औषधिको अभाव हुँदा बिरामीले समयमै उपचार पाउन समस्या भएको थियो। मनसुनमा सर्पदंश बढ्ने भएकाले यसको उपलब्धता झनै महत्वपूर्ण मानिएको छ।