काठमाडौँ । कामना सेवा विकास बैंक लिमिटेडले संस्थागत सामाजिक उत्तरदायित्वअन्तर्गत काठमाडौँको कुलेश्वरस्थित श्री कुलेश्वर माध्यमिक विद्यालयमा अध्ययनरत आर्थिक रूपमा विपन्न विद्यार्थीलाई शैक्षिक तथा आवश्यक सामग्री वितरण गरेको छ।
बैंकको कुलेश्वर शाखामार्फत आयोजित कार्यक्रममा बैंकका काठमाडौँ क्षेत्र प्रमुख केदारनाथ शर्माले विद्यार्थीलाई विद्यालय पोशाक तथा शैक्षिक सामग्री हस्तान्तरण गरेका थिए। विद्यार्थीको पठनपाठनमा सहजता पुर्याउने उद्देश्यले बैंकले स्टेशनरी तथा अन्य शैक्षिक सामग्रीसँगै विद्यालय झोला, विद्यालय पोशाक, गृह पोशाक, जुत्ता लगायत आवश्यक सामग्री वितरण गरेको जनाएको छ।
कार्यक्रममा विद्यालयका प्रधानाध्यापक भानुभक्त बिष्टले आर्थिक अभावका कारण आवश्यक शैक्षिक सामग्री जुटाउन कठिनाइ भएका विद्यार्थीलाई लक्षित गरी बैंकले गरेको सहयोगप्रति आभार व्यक्त गरे। उनले यस्ता सहयोगले विद्यार्थीलाई अध्ययनप्रति थप उत्साहित बनाउनुका साथै विद्यालयको शैक्षिक वातावरणमा समेत सकारात्मक प्रभाव पार्ने बताए।
सामग्री हस्तान्तरण गर्दै बैंकका काठमाडौँ क्षेत्र प्रमुख शर्माले बैंकले संस्थागत सामाजिक उत्तरदायित्वअन्तर्गत शिक्षा क्षेत्रलाई प्राथमिकतामा राखेर विभिन्न सहयोग कार्यक्रम सञ्चालन गर्दै आएको बताए। आर्थिक अभावका कारण आवश्यक शैक्षिक सामग्रीबाट वञ्चित विद्यार्थीलाई गरिएको सहयोगले उनीहरूको नियमित पठनपाठनमा प्रत्यक्ष सहयोग पुग्ने विश्वास उनले व्यक्त गरे।
बैंकले आगामी दिनमा पनि आवश्यकता र प्राथमिकताका आधारमा शिक्षा तथा अन्य सामाजिक क्षेत्रमा सामाजिक उत्तरदायित्वमूलक कार्यक्रमलाई निरन्तरता दिने जनाएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
