काठमाडौँ । नेपाली कांग्रेसका नेता डा. सुनिलकुमार शर्माले आर्थिक अभावका कारण उपचार गर्न नसक्ने एक हजार बिरामीको निःशुल्क शल्यक्रिया गर्ने घोषणा गरेका छन्।
शुक्रबार काठमाडौँमा आयोजित कार्यक्रममा बोल्दै शर्माले काठमाडौँ मेडिकल कलेज (केएमसी)अन्तर्गत दुवाकोट र विराटनगरस्थित नोबेल मेडिकल कलेजमार्फत गम्भीर रोगबाट पीडित आर्थिक रूपमा विपन्न बिरामीको एक हजारवटा शल्यक्रिया निःशुल्क गर्ने घोषणा गरेका हुन्।
उनले उपचार खर्च जुटाउन नसक्ने बिरामीलाई लक्षित गरी उक्त कार्यक्रम सञ्चालन गरिने बताए। आर्थिक रूपमा विपन्न विद्यार्थीलाई चिकित्सा शिक्षा अध्ययनमा सहयोग पुर्याउने उद्देश्यले मेडिकल कलेजमा छात्रवृत्तिको प्याकेज ल्याउने तयारीसमेत भइरहेको उनले जानकारी दिए।
शर्माले स्वर्गीय नेता गिरिजाप्रसाद कोइरालाको नाममा रहेको फाउन्डेसनका गतिविधिलाई देशका ७७ वटै जिल्लामा विस्तार गर्नुपर्ने आवश्यकता औँल्याए। नेता कोइरालाले पार्टी र मुलुकको आर्थिक समृद्धिका लागि खेलेको भूमिकालाई नयाँ पुस्तासम्म पुर्याउन फाउन्डेसनका गतिविधिलाई देशव्यापी बनाउनुपर्ने उनको भनाइ छ।
आफू नेता कोइरालासँगको राजनीतिक सम्बन्धलाई महत्वपूर्ण रूपमा लिने उल्लेख गर्दै शर्माले फाउन्डेसनमार्फत कोइरालाको योगदान र विचारलाई जनस्तरसम्म पुर्याउने काममा सक्रिय हुने प्रतिबद्धता व्यक्त गरे। यसका लागि कांग्रेस नेतृत्वसँग समन्वय गरेर अघि बढ्ने उनले बताए।
शर्माले फाउन्डेसनका गतिविधिलाई कांग्रेस र आम नागरिकको हितसँग जोडेर अघि बढाउनुपर्ने धारणा राखे। कोइरालाको राजनीतिक योगदान तथा मुलुकको आर्थिक विकासका लागि उनले खेलेको भूमिकाबारे नयाँ पुस्तालाई जानकारी गराउने गरी कार्यक्रम सञ्चालन गर्नुपर्नेमा उनले जोड दिए।
कार्यक्रममा शर्माले नेपाली कांग्रेसभित्र देखिएका विवाद समाधान गरेर पार्टीलाई नागरिकका मुद्दामा केन्द्रित गर्नुपर्ने बताए। आन्तरिक विवादमा अल्झिनुभन्दा जनताका समस्या, स्वास्थ्य, शिक्षा तथा आर्थिक अवस्थासँग प्रत्यक्ष जोडिएका विषयलाई प्राथमिकतामा राखेर काम गर्नुपर्ने उनको भनाइ थियो।
उनले पार्टीभित्रको एकता र समन्वय कायम गर्दै नागरिकका पक्षमा परिणाममुखी काम गर्न सके मात्र कांग्रेसप्रति जनताको विश्वास थप बलियो हुने धारणा व्यक्त गरे।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
