गोप्य सूचना चुहाउनेलाई कारबाही गर्ने गृहमन्त्रीको चेतावनी

काठमाडौँ । गृहमन्त्री सुधन गुरुङले सरकारी गोप्य तथा संवेदनशील सूचना बाहिर चुहाउने जोसुकैलाई कानुनी कारबाही गर्ने चेतावनी दिएका छन्। मंगलबार सामाजिक सञ्जालमार्फत उनले गृह मन्त्रालय र मातहतका कार्यालयमा रहेका कर्मचारी तथा अधिकारीलाई यस्तो चेतावनी दिएका हुन्।

गृहमन्त्री गुरुङले आफ्नो जिम्मेवारीको दुरुपयोग गर्दै गोप्य सूचना अनधिकृत व्यक्ति वा संस्थालाई दिने प्रवृत्तिमाथि आफूले लामो समयदेखि निगरानी गरिरहेको बताए। उनका अनुसार राज्यका संवेदनशील सूचना कुनै व्यक्तिको निजी सम्पत्ति होइनन्, ती सार्वजनिक जिम्मेवारीसँग जोडिएका विषय हुन्।

पदका कारण गोप्य सूचनामा पहुँच पाए पनि त्यसको गलत प्रयोग गर्ने अधिकार कसैलाई नभएको उनले स्पष्ट पारे। सानो सूचना वा सुराकले समेत अपराध रोक्न, अनुसन्धान अघि बढाउन र भविष्यमा भएका घटनाको वास्तविकता पत्ता लगाउन महत्वपूर्ण भूमिका खेल्ने उनको भनाइ छ।

गोपनीयताको जानाजान दुरुपयोग गरी देश र संस्थाप्रति विश्वासघात गर्ने कर्मचारी वा अधिकारीलाई कुनै छुट नदिइने र कानुनअनुसार कारबाही गरिने गृहमन्त्री गुरुङले बताएका छन्।