दसैंतिहारअघि संघीय संसद्को अधिवेशन अन्त्य गर्न सरकारको सिफारिस

काठमाडौं। सरकारले संघीय संसद्को चालू अधिवेशन असोज १६ गतेदेखि अन्त्य गर्न राष्ट्रपति रामचन्द्र पौडेलसमक्ष सिफारिस गरेको छ।

मंगलबार बसेको मन्त्रिपरिषद् बैठकले दसैंतिहारको समयलाई मध्यनजर गर्दै चालू अधिवेशन अन्त्यका लागि राष्ट्रपतिसमक्ष सिफारिस गर्ने निर्णय गरेको हो।

संविधानअनुसार संघीय संसद्को अधिवेशन आह्वान तथा अन्त्य मन्त्रिपरिषद्को सिफारिसमा राष्ट्रपतिबाट हुने व्यवस्था छ। सोही संवैधानिक व्यवस्थाअनुसार सरकारले अधिवेशन अन्त्यको प्रक्रिया अघि बढाएको हो।

संघीय संसद्को चालू अधिवेशन वैशाख २८ गतेदेखि सुरु भएको थियो। यस अवधिमा प्रतिनिधिसभामा १० भन्दा बढी विधेयक विभिन्न चरणमा संसदीय समितिहरूमा विचाराधीन छन्। केही विधेयक भने पारित हुने प्रक्रियाको अन्तिम चरणमा रहेका छन्।

अधिवेशन अन्त्य भएपछि विचाराधीन विधेयक तथा संसदीय कामकारबाही आगामी अधिवेशनमा अघि बढ्नेछन्।