काठमाडौँ । खाद्य प्रविधि तथा गुण नियन्त्रण विभागले हिमश्री फुड्स प्रालि पोखराले उत्पादन गरेको ‘रारा’ चाउचाउको एक ब्याच न्यूनस्तरको पाइएपछि बजारबाट तत्काल फिर्ता गर्न आदेश दिएको छ।
विभागले २०८३ भदौ ९ गते जारी गरेको सूचनाअनुसार बजार अनुगमन तथा निरीक्षणका क्रममा संकलन गरिएको खाद्य पदार्थको नमूना प्रयोगशालामा परीक्षण गर्दा उक्त चाउचाउ न्यूनस्तरको पाइएको हो।
विभागका अनुसार खाद्य स्वच्छता तथा गुणस्तर ऐन, २०८१ को दफा ३८ को उपदफा (२) बमोजिम सम्बन्धित उत्पादकलाई सो ब्याचका सम्पूर्ण खाद्य पदार्थ बजारबाट तत्काल फिर्ता गर्न आदेश दिइएको हो। साथै, ऐनको सोही दफाको उपदफा (४) बमोजिम उक्त खाद्य पदार्थको बिक्री तथा वितरण नगर्न र नगराउनसमेत निर्देशन दिइएको छ।
फिर्ता गर्न आदेश दिइएको खाद्य पदार्थ ६० ग्रामको ‘रारा’ चाउचाउ हो। यसको ब्याच नम्बर REG 01 रहेको छ। हिमश्री फुड्स प्रालि, पोखराले उत्पादन गरेको उक्त चाउचाउको उत्पादन मिति ५ फेब्रुअरी २०२६ रहेको विभागले जनाएको छ।
उक्त उत्पादनको उपभोग्य अवधि १२ महिना अर्थात् ‘बेस्ट बिफोर’ १२ महिनाको रहेको सूचनामा उल्लेख छ। प्रयोगशाला परीक्षणबाट खाद्य पदार्थ न्यूनस्तरको पुष्टि भएपछि विभागले सम्बन्धित ब्याचका सबै उत्पादन बजारबाट फिर्ता गरी बिक्री–वितरण रोक्न निर्देशन दिएको हो।
विभागले खाद्य स्वच्छता तथा गुणस्तर ऐन, २०८१ मा रहेको अधिकार प्रयोग गर्दै उपभोक्ताको स्वास्थ्य तथा खाद्य सुरक्षालाई ध्यानमा राखेर उक्त आदेश जारी गरेको जनाएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
