प्रतिकूल मौसमको सम्भावना, पर्यटकलाई सावधानी अपनाउन पर्यटन बोर्डको आग्रह

काठमाडौं । नेपाल पर्यटन बोर्डले आगामी केही दिनमा देशका विभिन्न क्षेत्रमा प्रतिकूल मौसमको सम्भावना रहेकाले पर्यटक, पदयात्री, पर्वतारोही तथा पर्यटन व्यवसायीलाई आवश्यक सावधानी अपनाउन आग्रह गरेको छ।

बोर्डले विशेषगरी असोज ९ गते शुक्रबारदेखि ११ गते आइतबारसम्म गण्डकी र लुम्बिनी प्रदेशलगायतका क्षेत्रमा भारी वर्षा, हावाहुरी तथा चट्याङको जोखिम रहेकाले मौसमको अवस्था हेरेर आवश्यक परे भ्रमण, पदयात्रा तथा आरोहणलगायतका गतिविधि स्थगित गर्नसमेत आग्रह गरेको हो।

पर्यटन बोर्डका प्रवक्ता सुनिल शर्माले अहिले पर्यटकीय मौसम भएकाले विभिन्न क्षेत्रमा हिमाल आरोहण, पदयात्रा, मेला तथा महोत्सव सञ्चालन भइरहेकाले प्रतिकूल मौसमलाई ध्यानमा राखेर उच्च सतर्कता अपनाउनुपर्ने बताउनुभयो। उहाँले भारी वर्षा, हावाहुरी र चट्याङको जोखिम रहेका क्षेत्रमा पर्यटकीय गतिविधि सञ्चालन गर्दा सुरक्षालाई प्राथमिकतामा राख्न आग्रह गर्नुभयो।

जल तथा मौसम विज्ञान विभागका अनुसार असोज ७ गते बुधबारदेखि नै कोशी, बागमती र गण्डकी प्रदेशमा वर्षाको गतिविधि बढ्ने सम्भावना छ। असोज ९ देखि ११ गतेसम्म गण्डकी र लुम्बिनी प्रदेशका केही स्थानमा भारीदेखि धेरै भारी वर्षा तथा एक–दुई स्थानमा अति भारी वर्षा हुन सक्ने पूर्वानुमान गरिएको छ।

त्यसैगरी कोशी, मधेश, बागमती र सुदूरपश्चिम प्रदेशका धेरै स्थान तथा कर्णाली प्रदेशका थोरै स्थानमा पनि भारी वर्षाको सम्भावना रहेको विभागले जनाएको छ।

प्रतिकूल मौसमका कारण बाढी, पहिरो तथा उच्च हिमाली क्षेत्रमा हिमपातको जोखिमसमेत रहेकाले बोर्डले पर्यटक तथा पर्यटन व्यवसायीलाई मौसमसम्बन्धी आधिकारिक सूचना नियमित रूपमा लिन आग्रह गरेको छ। जोखिमयुक्त मौसममा सुरक्षा अवस्थाको मूल्याङ्कन गरेर मात्र पर्यटकीय गतिविधि सञ्चालन गर्न बोर्डले अनुरोध गरेको छ।

बोर्डले पदयात्री तथा पर्वतारोहीलाई स्थानीय प्रशासन, सुरक्षा निकाय र सम्बन्धित पर्यटन व्यवसायीसँग समन्वय गरी यात्रा तथा आरोहणको तालिका तय गर्नसमेत आग्रह गरेको छ। साथै, मौसमसम्बन्धी पछिल्लो सूचना पर्यटन बोर्ड तथा मौसम पूर्वानुमान महाशाखाबाट नियमित रूपमा लिएर जोखिमको अवस्था अनुसार यात्रा योजना बनाउन भनिएको छ।