काठमाडौं — नेपाली कांग्रेसको १५औँ महाधिवेशनमा नयाँ नेतृत्व चयनका लागि विद्युतीय मतदान नहुने भएको छ। पार्टीले विद्युतीय मतदान मेसिन प्रयोग गर्दा पनि मतपरिणाम सार्वजनिक गर्न एक दिनभन्दा बढी समय लाग्न सक्ने देखिएपछि परम्परागत कागजी विधिबाट मतदान गराउने तयारी गरेको हो।
नेपाली कांग्रेसको १५औँ केन्द्रीय महाधिवेशन आइतबार काठमाडौंको खुलामञ्चमा उद्घाटन हुँदैछ। महाधिवेशनअन्तर्गत नयाँ नेतृत्वसहित केन्द्रीय कार्यसमिति चयनका लागि निर्वाचन प्रक्रिया अघि बढाइनेछ। केन्द्रीय निर्वाचन समितिको कार्यतालिकाअनुसार निर्वाचन प्रक्रिया असोज २२ र २३ गतेका लागि निर्धारण गरिएको छ।
करिब सात हजारभन्दा बढी महाधिवेशन प्रतिनिधि सहभागी हुने निर्वाचनमा विद्युतीय मतदान प्रणाली प्रयोग गर्ने विषयमा छलफल भए पनि त्यसबाट अपेक्षित समयमै परिणाम निकाल्न कठिन हुने निष्कर्षपछि कागजी मतपत्रमार्फत मतदान गर्ने निर्णय गरिएको हो।
मतदानका लागि काठमाडौंका तीन स्थानमा व्यवस्था मिलाउने तयारी गरिएको छ। खुलामञ्च, राष्ट्रिय सभा गृह र नेपाल प्रज्ञा–प्रतिष्ठान, कमलादीमा मतदान केन्द्र सञ्चालन गर्ने तयारी रहेको छ।
महाधिवेशनबाट पार्टीको नयाँ नेतृत्वसहित केन्द्रीय कार्यसमिति चयन हुनेछ। त्यसका लागि उम्मेदवारी दर्तालगायत निर्वाचनसम्बन्धी प्रक्रिया अघि बढाइने कांग्रेसले जनाएको छ।
विद्युतीय मतदानको विकल्पमा कागजी मतपत्रबाट मतदान गर्ने भएपछि ठूलो संख्यामा प्रतिनिधिले मतदान गर्ने अवस्थालाई व्यवस्थापन गर्न मतदान केन्द्र, प्रतिनिधिको आवागमन र मतगणनाको प्रक्रियालाई व्यवस्थित बनाउने चुनौती कांग्रेससामु रहनेछ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
