प्रभु बैंकका तत्कालीन सीईओ अशोक शेरचनलाई पुर्पक्षका लागि थुनामा पठाउन आदेश

काठमाडौं । प्रभु बैंकका तत्कालीन प्रमुख कार्यकारी अधिकृत (सीईओ) अशोक शेरचनलाई उच्च अदालत पाटनले पुर्पक्षका लागि थुनामा पठाउन आदेश दिएको छ।

बैंकिङ कसुरसम्बन्धी मुद्दामा मंगलबार उच्च अदालत पाटनका न्यायाधीश गणेशप्रसाद बराल र राजुकुमार खतिवडाको संयुक्त इजलासले शेरचनलाई थुनामा राखेर मुद्दाको पुर्पक्ष गर्न आदेश दिएको हो।

शेरचनविरुद्ध विप्रेषण कारोबारबापत बैंकले प्राप्त गर्नुपर्ने ८ करोड ९३ लाख १९ हजार ९८६ रुपैयाँ ३० पैसा ब्याज प्राप्त नभएको तथा सञ्चालक समितिको पूर्वनिर्णयबिना गुण एयरलाइन्सको नाममा १५ करोड रुपैयाँ कर्जा प्रवाह गरेको आरोपमा मुद्दा दायर भएको थियो। उक्त मुद्दामा शेरचनविरुद्ध २० करोड १७ लाख ६७ हजार ३३४ रुपैयाँ ३० पैसा बिगो कायम गरिएको छ।

अदालतमा भएको बयानका क्रममा शेरचनले गुण एयरलाइन्सलाई कर्जा प्रवाह गर्दा सञ्चालक समितिको पूर्वस्वीकृति नलिएको स्वीकार गरेको आदेशमा उल्लेख छ। सञ्चालक समितिबाट पछि अनुमोदन गराउने गरी कर्जा प्रवाह गरिएको उनले बयान दिएको अदालतको आदेशमा जनाइएको छ।

बैंकले आफूले प्राप्त गर्नुपर्ने ब्याज रकम प्राप्त नभएको विषयमा केन्द्रीय अनुसन्धान ब्युरो (सीआईबी) लाई पत्राचार गरेको थियो। अनुसन्धानका क्रममा बैंकका कर्मचारीहरूले समेत शेरचनको निर्देशनमा सञ्चालक समितिको निर्णय हुनुअघि नै कर्जा प्रवाह गरिएको व्यहोरा कागज गरेको अदालतको आदेशमा उल्लेख छ।

मुद्दाको पुर्पक्षका क्रममा अदालतले नेपाल राष्ट्र बैंकका प्रतिवेदन, प्रहरी अनुसन्धान प्रतिवेदन, शेरचनको बयान, घटनासम्बन्धी कागज गर्ने व्यक्तिहरूको भनाइ तथा सहप्रतिवादीहरूको बयानलगायत मिसिलमा संलग्न तत्काल प्राप्त प्रमाणको अध्ययन गरेको थियो।

उक्त प्रमाणका आधारमा शेरचनलाई तत्काल निर्दोष मान्न सकिने अवस्था नरहेको निष्कर्षमा अदालत पुगेको हो। त्यसपछि मुलुकी फौजदारी कार्यविधि संहिता, २०७४ को दफा ६७ बमोजिम उनलाई पुर्पक्षका लागि थुनामा राख्ने आदेश दिइएको अदालतको आदेशमा उल्लेख छ।

यस आदेशसँगै शेरचनविरुद्धको बैंकिङ कसुरसम्बन्धी मुद्दा अब पुर्पक्षको चरणमा अघि बढ्ने भएको छ।