दसैँमा तोकिएकोभन्दा बढी भाडा नलिन यातायात व्यवसायी महासङ्घको आग्रह

काठमाडौं। नेपाल यातायात व्यवसायी राष्ट्रिय महासङ्घले दसैँलगायत चाडपर्वको समयमा सरकारले निर्धारण गरेकोभन्दा बढी सवारी भाडा नलिन यातायात व्यवसायी तथा सम्बद्ध पक्षलाई आग्रह गरेको छ।

महासङ्घका महासचिव डेकनाथ गौतमले तोकिएकोभन्दा बढी भाडा असुल गर्ने सवारीसाधनमाथि प्रचलित कानुनअनुसार कारबाही हुने बताएका छन्। सरकारले यस वर्षको दसैँलाई लक्षित गर्दै असोज २३ गतेदेखि देशभर यात्रुवाहक सवारीसाधनको अग्रिम टिकट बुकिङ खुला गर्ने निर्णय गरिसकेको छ।

यात्रु तथा मालवाहक सवारीसाधनको सञ्चालनलाई सहज, व्यवस्थित र सुरक्षित बनाउन यातायात व्यवस्था विभाग, नेपाल यातायात व्यवसायी राष्ट्रिय महासङ्घ, मजदुर सङ्घ–सङ्गठन, प्रहरी प्रधान कार्यालय तथा उपत्यका ट्राफिक प्रहरी कार्यालयबीचको समन्वयमा अग्रिम टिकट बुकिङ खुला गर्न लागिएको हो।

महासङ्घले सातै प्रदेश, जिल्ला समिति तथा सदस्य सङ्घ–संस्थालाई आवश्यक निर्देशन दिइसकेको जनाएको छ। काठमाडौँको गोङ्गबु बसपार्कमा रहेका शाखा प्रमुख तथा कर्मचारीलाई समेत यात्रुको चाप व्यवस्थापन, टिकट वितरण र सेवा प्रवाहलाई व्यवस्थित बनाउन निर्देशन दिइएको छ।

महासङ्घका अनुसार अग्रिम टिकट बुकिङ काउन्टरमा खटिने कर्मचारीले तोकिएको पोसाक र परिचयपत्र अनिवार्य रूपमा प्रयोग गर्नुपर्नेछ। यात्रुसँग मर्यादित तथा नम्र व्यवहार गर्दै सहज रूपमा टिकट उपलब्ध गराउन र सुरक्षित यात्राको व्यवस्था मिलाउन कर्मचारीलाई निर्देशन दिइएको छ।

ठूला सवारीसाधन सञ्चालनमा अस्थायी रोक

दसैँको समयमा सडकमा यात्रुको चाप र सवारीसाधनको आवागमन बढ्ने भएकाले घटस्थापनादेखि कात्तिक ८ गतेसम्म नारायणगढ–काठमाडौँ सडकखण्डमा ट्रेलरलगायत ठूला सवारीसाधन सञ्चालनमा रोक लगाइने भएको छ।

तर खाद्य सामग्री, औषधि, फलफूल तथा अन्य अत्यावश्यक सामग्री बोकेका सवारीसाधनको आवतजावतमा भने उक्त प्रतिबन्ध लागू नहुने महासङ्घले जनाएको छ।

त्यसैगरी, घटस्थापनादेखि कात्तिक १० गतेसम्म यात्रुवाहक सवारीसाधनका लागि देशभर लामो तथा मध्यम दूरीका रुट परमिट खुला गरिएको छ। सडकको विशेष प्रकृतिका कारण निश्चित आकार तथा प्रकारका सार्वजनिक सवारीसाधन सञ्चालनमा लगाइएको प्रतिबन्ध भने यथावत् रहने जनाइएको छ।

यात्रु सहायता कक्ष र सवारी परीक्षणमा जोड

दसैँमा यात्रुको चाप बढ्ने प्रमुख नाकामा स्थापना गरिएका यात्रु सहायता कक्षको अनुगमन तथा सहजीकरणका लागि यातायात व्यवस्था विभागले फोकल पर्सनसहितको टोली परिचालन गर्ने भएको छ।

महासङ्घले पनि गोङ्गबु बसपार्क, कलङ्की, कोटेश्वर, गौशाला तथा चाबहिल क्षेत्रमा प्रतिनिधि खटाएर यात्रु सहायता तथा समन्वयको जिम्मेवारी तोकेको जनाएको छ।

चाडपर्वका समयमा सञ्चालन हुने यात्रुवाहक सवारीसाधनको फिटनेस परीक्षणलाई समेत प्राथमिकता दिइएको छ। यातायात व्यवस्था विभागको सवारी परीक्षण कार्यालय, टेकुबाट प्राविधिक कर्मचारी खटाई गोङ्गबु बसपार्कमै सवारीसाधनको निःशुल्क फिटनेस परीक्षण गर्ने व्यवस्था मिलाइने भएको छ।

महासङ्घले चाडपर्वका समयमा यात्रुको आवागमनलाई सुरक्षित, व्यवस्थित र सहज बनाउन व्यवसायी, चालक, कर्मचारी तथा यात्रु सबैलाई निर्धारित नियम पालना गर्न आग्रह गरेको छ।