बुटवल । लुम्बिनी विकास कोषको उपाध्यक्षमा गायिका आनी छोइङ डोल्मालाई नियुक्त गर्ने सरकारको निर्णयविरुद्ध आन्दोलन गर्दै आएका ‘लुम्बिनी बचाउ महाअभियान’का संयोजक अक्रम खान र वाजिउद्दिन मुसलमानलाई प्रहरीले रिहा गरेको छ।
सरकारी निर्णयको विरोधमा आयोजित प्रदर्शनका क्रममा संस्कृति, पर्यटन तथा नागरिक उड्डयनमन्त्री खडकराज पौडेल ‘गनेश’को तस्बिर जलाएको आरोपमा सोमबार राति पक्राउ परेका उनीहरूलाई मंगलबार दिउँसो रिहा गरिएको हो।
सार्वजनिक शान्ति र सुव्यवस्थामा खलल पुर्याएको आरोपमा नियन्त्रणमा लिइएका दुवै जनालाई राष्ट्रिय स्वतन्त्र पार्टी (रास्वपा)का सांसद कन्हैया बनिया र तौफिक अहमद खानको रोहवरमा तथा खानका भाइ फकरुद्दिन खानको जिम्मामा छाडिएको जनाइएको छ।
रिहापछि आयोजित पत्रकार सम्मेलनमा महाअभियानका संयोजक खानले आफूलाई सोमबार राति करिब साढे १० बजे प्रसाद चोकबाट प्रहरीले नियन्त्रणमा लिएको बताए। होटलतर्फ जाँदै गर्दा पाहुनासँग रहेकाले पछि प्रहरीसमक्ष उपस्थित हुने आग्रह गरे पनि जबरजस्ती गाडीमा राखेर लुम्बिनी पुर्याइएको उनको दाबी छ।
खानका अनुसार नियन्त्रणमा लिएपछि भीम अस्पतालमा सामान्य स्वास्थ्य परीक्षण गराई उनलाई रातभर हिरासतमा राखिएको थियो। प्रहरी अधिकारीहरूसँगको छलफलमा लुम्बिनी क्षेत्रमा सडक अवरोध तथा पुत्ला दहनजस्ता गतिविधि नगरी आफ्ना माग शान्तिपूर्ण रूपमा प्रस्तुत गर्न सुझाव दिइएको उनले जानकारी दिए।
लुम्बिनीको संरक्षण, विकास र स्थानीयवासीको हित सुनिश्चित गर्न महाअभियानले लामो समयदेखि आवाज उठाउँदै आएको उल्लेख गर्दै खानले सरकारले मागप्रति बेवास्ता गरेपछि विभिन्न चरणमा विरोधका कार्यक्रम सञ्चालन गरिएको बताए। यसअघि प्रदर्शन, सभा, पत्रकार सम्मेलन तथा सम्बन्धित मन्त्रीहरूलाई ज्ञापनपत्र बुझाउनेलगायतका कार्यक्रम गरिएको उनको भनाइ छ।
पर्यटनमन्त्रीको तस्बिर जलाउने कार्यलाई सरकारको निर्णय र कार्यशैलीप्रतिको असन्तुष्टि व्यक्त गर्ने प्रतीकात्मक विरोधका रूपमा व्याख्या गर्दै खानले लुम्बिनीको संरक्षण र विकासका विषयमा सरकार गम्भीर बन्नुपर्नेमा जोड दिए।
उनले कानुनी प्रक्रियाको सम्मान गर्दै लुम्बिनीको हितमा सञ्चालित अभियानलाई निरन्तरता दिने स्पष्ट पारे। प्रहरीले फोनमार्फत बोलाएको भए आफू स्वेच्छाले उपस्थित हुने बताउँदै उनले पक्राउ गर्ने क्रममा अपनाइएको शैलीप्रति असन्तुष्टि व्यक्त गरे।
खानले आफूहरू आन्दोलनबाट पछि नहट्ने तर आगामी कार्यक्रम शान्तिपूर्ण र कानुनसम्मत ढंगले सञ्चालन गर्ने प्रतिबद्धता जनाए। लुम्बिनीलाई राजनीतिक स्वार्थभन्दा माथि राखेर बुद्धको दर्शन, ऐतिहासिक महत्त्व र स्थानीय समुदायको हितअनुकूल विकास गर्न सरकारसँग उनले माग गरे।
लुम्बिनी विकास कोषको नेतृत्वमा गरिएको नियुक्तिप्रति असन्तुष्टि जनाउँदै महाअभियानले विरोधका कार्यक्रम सञ्चालन गर्दै आएको छ। संयोजक खानसहित दुई जना रिहा भएसँगै अभियानले आफ्ना माग सम्बोधन नभएसम्म शान्तिपूर्ण रूपमा दबाबमूलक गतिविधि जारी राख्ने जनाएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
