सरकार र अनशनरत नर्स ज्योति रानाभाटबीच १९ बुँदे सहमति

काठमाडौँ ।  अनशनरत नर्स ज्योति रानाभाट र सरकारबीच बुधबार १९ बुँदे सहमति भएको छ। स्वास्थ्य तथा खाद्य स्वच्छता मन्त्रालयसँग भएको वार्तापछि सहमति बनेसँगै रानाभाटले जुस पिएर आफ्नो अनशन अन्त्य गरेकी हुन्। उनले साउन १४ गतेदेखि विभिन्न माग राख्दै अनशन सुरु गरेकी थिइन्।

सहमतिअनुसार नर्स, मिडवाइफ तथा अन्य स्वास्थ्यकर्मीको तलब, सेवा–सुविधा र कार्य अवस्थाबारे अध्ययन गर्न सात दिनभित्र कार्यदल गठन गरिनेछ। छात्रवृत्तिमा अध्ययन गरेका नर्सलाई योग्यता अनुसार जिम्मेवारी र अवसर दिने व्यवस्था गरिनेछ। अस्पतालहरूमा नर्सिङ सेवा, बिरामी सुरक्षा, सङ्क्रमण नियन्त्रण र सेवा गुणस्तरका मापदण्ड अनिवार्य लागू गरिनेछ। साथै, सम्मानजनक मातृत्व सेवा, नर्सिङ शिक्षाको गुणस्तर सुधार, तालिम, नेतृत्व विकास तथा स्वास्थ्य सेवा सम्बन्धी ऐन–नियममा आवश्यक संशोधन गर्ने विषयमा पनि सरकार र नर्स पक्षबीच सहमति भएको छ।