ट्रन्क्यूलिटी स्पाले प्राप्त गर्‍यो आईएसओ ९००१ः२०१५ प्रमाणपत्र, नेपालको पहिलो आईएसओ प्रमाणित वेलनेस ब्रान्ड भएको दाबी

काठमाडौं । ट्रन्क्यूलिटी स्पा प्रालिले गुणस्तर व्यवस्थापन प्रणालीअन्तर्गत आईएसओ ९००१ः२०१५ प्रमाणपत्र प्राप्त गरेको जनाएको छ। कम्पनीका अनुसार यो प्रमाणपत्र युनाइटेड रजिस्ट्रार अफ सिस्टम्स (यूआरएस) बाट प्रदान गरिएको हो, जुन युनाइटेड किङ्डम एक्रिडिटेसन सर्भिस (यूकेएएस) र अन्तर्राष्ट्रिय मान्यता मञ्च (आईएएफ) बाट मान्यता प्राप्त प्रमाणीकरण निकाय हो।

कम्पनीले यो प्रमाणपत्रसँगै आफू नेपालकै पहिलो तथा एकमात्र आईएसओ ९००१ः२०१५ प्रमाणित वेलनेस ब्रान्ड बनेको दाबी गरेको छ। कम्पनीका अनुसार प्रमाणीकरणले वेलनेस तथा सौन्दर्य सेवामा लागू गरिएको गुणस्तर व्यवस्थापन प्रणालीलाई अन्तर्राष्ट्रिय मापदण्डअनुसार मान्यता दिएको हो।

प्रमाणीकरणको दायराभित्र चिकित्सकीय मसाज, विभिन्न प्रकारका सौन्दर्य उपचार सेवा, बाफ स्नान, साउना, ज्याकुजी, व्यायामशाला, पौडी पोखरी तथा टेनिस सुविधालगायतका सेवा समेटिएका छन्। कम्पनीले सञ्चालन प्रणाली, सरसफाइ, सेवा प्रवाह तथा ग्राहक सेवा व्यवस्थापनले अन्तर्राष्ट्रिय गुणस्तरका मापदण्ड पूरा गरेको जनाएको छ।

कम्पनीका प्रमुख कार्यकारी अधिकृत भुवन फैजुले आईएसओ ९००१ः२०१५ प्रमाणपत्र प्राप्त गर्नु संस्थाका लागि महत्वपूर्ण उपलब्धि मात्र नभई प्रत्येक ग्राहकप्रतिको गुणस्तरीय सेवा, सरसफाइ र समान स्तरको अनुभव प्रदान गर्ने प्रतिबद्धताको औपचारिक पुष्टि भएको बताए।

त्यस्तै, प्रमुख सञ्चालन अधिकृत रनिल फैजुले यो प्रमाणीकरण वर्षौंदेखि कम्पनीले अवलम्बन गर्दै आएको सेवा प्रणाली, गुणस्तर व्यवस्थापन र सञ्चालन मापदण्डको अन्तर्राष्ट्रिय स्तरमा भएको मान्यताको रूपमा रहेको उल्लेख गरे। उनले गुणस्तर, सरसफाइ र सेवाको निरन्तरतामा कम्पनीको प्रतिबद्धता आगामी दिनमा अझ सुदृढ बनाइने बताए।

कम्पनीका अनुसार ट्रन्क्यूलिटी स्पाले विगत १८ वर्षदेखि नेपाल तथा विदेशमा वेलनेस सेवा प्रदान गर्दै आएको छ। काठमाडौंको लाजिम्पाटबाट सुरु भएको यसको सेवा अहिले काठमाडौं, चितवन, पोखरा, भैरहवा तथा मलेसियाका विभिन्न प्रतिष्ठित होटलसँगको सहकार्यमा विस्तार भएको छ।

हाल कम्पनीमा ३०० भन्दा बढी कर्मचारी कार्यरत रहेका छन्। कम्पनीको प्रशिक्षण संस्था ‘ट्रन्क्यूलिटी इन्टरनेसनल ब्यूटी एन्ड स्पा एकेडेमी’मार्फत हालसम्म ३ हजार ५०० भन्दा बढी व्यक्तिलाई वेलनेससम्बन्धी सीपमूलक तालिम प्रदान गरिएको कम्पनीले जनाएको छ।