काठमाडौं । अर्थमन्त्री डा. स्वर्णिम वाग्लेले नेपाल राष्ट्र बैंकलाई केवल नियम बनाउने संस्था नभई देशको आर्थिक विकासमा सक्रिय भूमिका खेल्ने सहयात्री बन्न आग्रह गरेका छन्। बुधबार राष्ट्र बैंकका कार्यकारी निर्देशकहरूसँग छलफल गर्दै उनले अबको नियमनले व्यवसाय र उत्पादन बढाउन सहयोग गर्ने खालको हुनुपर्ने बताए।
अर्थमन्त्री वाग्लेले उद्योगी, व्यवसायी र बैंकहरूसँगको छलफलमा निजी क्षेत्रले अहिले धेरै सुविधा माग्नुभन्दा पनि स्पष्ट नीति, स्थिर नियम र त्यसको प्रभावकारी कार्यान्वयन चाहेको बताए। उनले पछिल्लो दशकमा नीति बने पनि अपेक्षित आर्थिक सुधार किन हुन नसकेको र निजी क्षेत्र किन कमजोर अवस्थामा पुगेको भन्ने विषयमा समीक्षा गर्नुपर्ने बताए।
उनले बैंकमा पैसा थुप्रिए पनि उद्योग तथा उत्पादन क्षेत्रमा कर्जा प्रवाह हुन नसकेको, पुँजी बजार र वास्तविक अर्थतन्त्रबीचको सम्बन्ध कमजोर भएको जस्ता समस्या समाधानमा ध्यान दिनुपर्ने बताए। राष्ट्र बैंकले उत्पादनमूलक क्षेत्रमा लगानी बढाउने, रोजगारी सिर्जना गर्ने र नयाँ वित्तीय प्रविधिलाई प्रोत्साहन गर्ने नीति ल्याउनुपर्ने उनको भनाइ थियो।
मन्त्री वाग्लेले सरकार, राष्ट्र बैंक र निजी क्षेत्र मिलेर अघि बढे आर्थिक वृद्धि हासिल गर्न सकिने बताए। छलफलका विषयलाई कार्ययोजनामा बदल्ने र आवश्यक परे संयुक्त टोली बनाएर काम गर्ने प्रतिबद्धता पनि उनले व्यक्त गरे।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
