ग्यास नपाए हटलाइनमा सम्पर्क गर्न आयल निगमको आग्रह

काठमाडौँ ।  नेपाल आयल निगमले बजारमा खाना पकाउने ग्यासको कुनै अभाव नरहेको जनाएको छ। निगमका अनुसार देशभर दैनिक मागअनुसार ग्यास नियमित रूपमा आपूर्ति भइरहेको छ। पछिल्लो समय ग्यासको माग बढेकाले यस महिनामा आयातको मात्रा पनि बढाइएको छ। साउन १ देखि १८ गतेसम्म ३१ हजार ८१६ मेट्रिक टन ग्यास आयात भइसकेको निगमले जनाएको छ।

काठमाडौं उपत्यकामा बढी माग भएका ग्यास उद्योगहरूको ग्यास टेकुस्थित निगमको कार्यालयबाट पनि बिक्री भइरहेको छ। नेपाल ग्यास, एचपी ग्यास, एभरेष्ट ग्यास, सुगम ग्यास र श्रीराम ग्यास बिहान ११ बजेदेखि बेलुका ५ बजेसम्म उपलब्ध हुने निगमले जनाएको छ। ग्यास नपाएमा वा कुनै गुनासो भए कार्यालय समयभित्र निगमको हटलाइन नम्बर ०१–५९७१९०२ मा सम्पर्क गर्न आग्रह गरिएको छ।