मन्त्रीलाई हेलिकप्टर, जनतालाई सिटामोलसमेत छैन:वासना थापा

काठमाडौँ । नेपाली कांग्रेसले सरकार मन्त्रीहरूको सुविधा र विलासितामा बढी केन्द्रित भएको आरोप लगाएको छ। मंगलबार संसद् बैठकमा कांग्रेस प्रमुख सचेतक वासना थापाले दुर्गम क्षेत्रका नागरिकले सामान्य औषधि र उपचारसमेत नपाएको तर मन्त्री बिरामी हुँदा राज्यको ठूलो रकम खर्च गरेर हेलिकप्टरबाट काठमाडौं ल्याइएको भन्दै सरकारको आलोचना गरिन्।

उनले जनतालाई राहत दिन नसक्ने सरकारले मन्त्रीलाई काठमाडौं ल्याउन लाखौँ रुपैयाँ खर्च गर्नु गलत भएको बताइन्। गरिब नागरिकलाई खाना जुटाउन र ग्यास किन्नसमेत समस्या रहेको अवस्थामा सरकारको सुशासनको दाबी व्यवहारमा नदेखिएको उनको भनाइ छ।

थापाले मन्त्री र सामान्य नागरिकको जीवनलाई राज्यले समान महत्व दिनुपर्ने बताउँदै प्रश्न गरिन्—मन्त्रीका लागि हेलिकप्टर पुग्ने तर दुर्गमका बिरामीका लागि अस्पताल र औषधि नपुग्ने अवस्था कसरी जनताको सरकार हुन सक्छ ?