खाद्य व्यवस्था कम्पनीको नयाँ बिक्री कक्ष सिंहदरबारमा सञ्चालन

काठमाडौं । उद्योग, वाणिज्य तथा आपूर्तिमन्त्री गौरीकुमारी यादवले सिंहदरबारस्थित मन्त्रालय परिसर नजिकै खाद्य व्यवस्था तथा व्यापार कम्पनी लिमिटेडको नयाँ बिक्री कक्ष उद्घाटन गरेकी छन्। कर्मचारी, सेवाग्राही तथा सिंहदरबारमा विभिन्न कामले आउने सर्वसाधारणलाई सहज र सहुलियत मूल्यमा खाद्यवस्तु उपलब्ध गराउने उद्देश्यले बिक्री कक्ष सञ्चालनमा ल्याइएको हो।

बिहीबार आयोजित कार्यक्रममा बिक्री कक्ष उद्घाटन गर्दै मन्त्री यादवले सिंहदरबारमा कार्यरत कर्मचारी तथा सेवाग्राहीलाई बिक्री कक्षको सेवा उपयोग गर्न आग्रह गरिन्। उनले बिक्री कक्षमा उपलब्ध खाद्यवस्तुका बारेमा जानकारी लिन तथा कम्तीमा एकपटक अवलोकन गर्नसमेत आग्रह गरेकी छन्।

मन्त्री यादवले काठमाडौं उपत्यकाका विभिन्न पाँच स्थानमा खाद्य व्यवस्था तथा व्यापार कम्पनीका बिक्री केन्द्र सञ्चालनमा रहेको जानकारी दिँदै आगामी दिनमा थप स्थानमा सेवा विस्तार गर्ने तयारी भइरहेको बताइन्। उनले निजी क्षेत्रको ठूलो खुद्रा बजारका रूपमा रहेको भाटभटेनीमा समेत कम्पनीका खाद्यवस्तु बिक्री गर्ने गरी स्टल राख्ने योजना रहेको जानकारी दिइन्।

कम्पनीका निमित्त प्रमुख कार्यकारी अधिकृत डिल्लीराज लम्सालले कर्मचारी, सेवाग्राही तथा सिंहदरबारमा विभिन्न कामले आउने नागरिकको मागलाई ध्यानमा राख्दै बिक्री कक्ष सञ्चालनमा ल्याइएको बताए। मन्त्रीको निर्देशनसमेतलाई आधार बनाएर सिंहदरबारभित्र कम्पनीको सेवा विस्तार गरिएको उनको भनाइ थियो।

कम्पनीले आफ्नो सातौँ वार्षिकोत्सवको अवसर पारेर देशभरका १९३ स्थानबाट विभिन्न खाद्यवस्तु सहुलियत मूल्यमा बिक्री गरिरहेको पनि लम्सालले जानकारी दिए। उनका अनुसार वार्षिकोत्सवको अवसरमा विभिन्न खाद्यवस्तुमा प्रतिकिलो पाँच रुपैयाँ छुटको व्यवस्था गरिएको छ।

नयाँ बिक्री कक्ष सञ्चालनसँगै सिंहदरबारमा कार्यरत कर्मचारी, सेवाग्राही तथा सर्वसाधारणले दैनिक उपभोग्य खाद्यवस्तु सहज रूपमा खरिद गर्न सक्ने कम्पनीले जनाएको छ। कम्पनीले आगामी दिनमा बिक्री केन्द्रको संख्या र पहुँच थप विस्तार गर्दै सहुलियत मूल्यमा खाद्यवस्तुको उपलब्धता बढाउने तयारी गरेको छ।