नियमभन्दा मानिसको जीवन ठूलो हो: गणेश कार्की

काठमाडौँ । राष्ट्रिय स्वतन्त्र पार्टी (रास्वपा) का सांसद गणेश कार्कीले कानुनभन्दा मानिसको जीवन र मानवीय संवेदना ठूलो हुने बताएका छन्। उनले सामाजिक सञ्जालमार्फत आफ्नो धारणा सार्वजनिक गर्दै सरकार वा पार्टीको समर्थन गर्ने नाममा मानवीय पक्षलाई बेवास्ता नगर्न आग्रह गरेका हुन्।

कार्कीले नियम मानिसको सहज जीवनका लागि बनाइने भएकाले मानिसलाई नै समस्या पर्ने अवस्थामा त्यसको समीक्षा गर्नुपर्ने बताए। उनले कुनै नियम पालना गर्दा नागरिकलाई असह्य पीडा हुन्छ वा जीवन नै जोखिममा पर्छ भने नियम सुधार गर्ने वा त्यसबारे जनतालाई राम्रोसँग बुझाउने काम गर्नुपर्ने उल्लेख गरे।

उनले मानिस र नियममध्ये एउटा रोज्नुपर्ने अवस्था आए आफूले मानिसको जीवन रोज्ने बताए। साथै, उनले नेपालमा आत्महत्याको समस्या गम्भीर रहेको उल्लेख गर्दै मानसिक समस्या र आवेगका कारण हुने यस्ता घटनालाई कम गर्न जनचेतना र छलफल आवश्यक रहेको बताए। उनले सबैलाई आत्महत्या रोकथामका विषयमा जानकारी फैलाउन आग्रह गरेका छन्।