काठमाडौँ । प्रधानमन्त्री बालेन्द्र शाहले आज प्रतिनिधिसभाको बैठकमा सांसदहरूले सोधेका प्रश्नको जवाफ दिने भएका छन्। संघीय संसद् सचिवालयका अनुसार दिउँसो १ बजे बस्ने बैठकमा प्रधानमन्त्रीसँग प्रत्यक्ष प्रश्नोत्तर कार्यक्रम हुनेछ।
प्रतिनिधिसभा नियमावली, २०८३ अनुसार प्रधानमन्त्रीले सांसदका प्रश्नको जवाफ दिनुपर्ने व्यवस्था छ। तर, लामो समयसम्म प्रश्नोत्तर कार्यक्रम नभएको भन्दै विपक्षी सांसदहरूले विरोध गर्दै आएका थिए। विपक्षी दलहरूको दबाबपछि सभामुख डोलप्रसाद अर्यालले प्रधानमन्त्री शाहलाई बुधबार प्रश्नोत्तर कार्यक्रममा सहभागी हुन रुलिङ गरेका हुन्।
आजको कार्यक्रममा विभिन्न दलका ११ सांसदले प्रधानमन्त्रीलाई प्रश्न सोध्नेछन्। राष्ट्रिय स्वतन्त्र पार्टीबाट समीक्षा बाँस्कोटा, अमरेशकुमार सिंह र कृष्णहरि बुढाथोकी, कांग्रेसबाट वासना थापा र गीता गुरुङ तथा एमालेबाट ऐनबहादुर महर र गणेशसिंह ठगुन्नाले प्रश्न गर्नेछन्। त्यस्तै, नेकपाबाट वर्षमान पुन र प्रमेशकुमार हमाल, श्रम संस्कृति पार्टीका हर्कराज राई तथा राप्रपाकी खुश्बु ओलीले पनि प्रश्न गर्नेछन्।
सांसदहरूले सरकारका काम, नीति, निर्णय र समसामयिक राजनीतिक विषयबारे प्रधानमन्त्रीसँग जवाफ माग्ने तयारी गरेका छन्। यसअघि संसदमा प्रधानमन्त्री शाहले दिएको जवाफ तयारीबिनाको भन्दै आलोचना भएको थियो।
बैठकमा प्रधानमन्त्री शाहले मुस्लिम आयोगको सातौँ वार्षिक प्रतिवेदन पनि प्रस्तुत गर्नेछन्। ऊर्जा मन्त्री विराजभक्त श्रेष्ठले नेपाल–भारत दीर्घकालीन विद्युत् व्यापारसम्बन्धी सम्झौता पेश गर्ने कार्यक्रम पनि छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
