सम्पत्ति विवरण विवादपछि गृहमन्त्रीले दिए राजीनामा,१३ दिन र २६ दिनमै दुई मन्त्री बाहिरिए

काठमाडौं । सरकार गठन भएको छोटो अवधिमै मन्त्री परिवर्तनको क्रम जारी रहँदा गृहमन्त्री सुधन गुरुङले राजीनामा दिएका छन्। उनको सम्पत्ति विवरण सार्वजनिक भएपछि त्यसको स्रोत र स्वाभाविकताबारे प्रश्न उठ्दै विवाद चुलिएको थियो। विभिन्न क्षेत्रमा गरिएको लगानी तथा सामाजिक संस्थामार्फत भएको आर्थिक कारोबारबारे समेत शंका व्यक्त भएपछि उनीमाथि दबाब बढेको बताइन्छ।

यसअघि श्रम मन्त्री दीपककुमार साह १३ दिनमै पदबाट बाहिरिएका थिए। आफ्नी श्रीमतीलाई बिमा बोर्डको सदस्यमा अनधिकृत रूपमा संलग्न गराउने विषयमा विवादमा परेपछि उनलाई राजनीतिक दलको सिफारिसका आधारमा पदबाट फिर्ता बोलाइएको थियो।

गृहमन्त्री गुरुङले केही दिनअघि मात्र सम्पत्ति विवरण सार्वजनिक गरेका थिए। तर उक्त विवरण अस्वाभाविक रहेको भन्दै प्रश्न उठिरहँदा, माइक्रो इन्स्योरेन्स लगायत क्षेत्रमा गरिएको लगानीसम्बन्धी थप विवरण पनि सार्वजनिक भयो। साथै, उनले सञ्चालन गरेको सामाजिक संस्था मार्फत आएको सहयोग रकम व्यक्तिगत खातामार्फत कारोबार गरिएको दाबीसमेत बाहिरिएपछि विवाद झन् बढेको थियो।

लगातार बढ्दो राजनीतिक तथा सार्वजनिक दबाबबीच अन्ततः उनले बुधबार पदबाट राजीनामा दिएका हुन्। सरकार गठनको २६ दिनमै दुई मन्त्री बाहिरिनुले राजनीतिक स्थिरता र पारदर्शिताबारे बहस चर्किएको छ।