विद्यार्थीलाई सहज कर्जा: माछापुच्छ्रे बैंकको २५ वर्षसम्म अवधि भएको योजना

काठमाडौँ। उच्च शिक्षा हासिल गर्न चाहने विद्यार्थीलाई लक्षित गर्दै माछापुच्छ्रे बैंक लिमिटेड ले शिक्षा कर्जा योजना सञ्चालनमा ल्याएको छ। बैंकले स्वदेश तथा विदेशमा अध्ययन गर्न चाहने विद्यार्थीहरूको भर्ना शुल्क, अध्ययन शुल्क, स्वास्थ्य बिमा, यात्रा खर्च, पुस्तक तथा अध्ययन सामग्री, धरौटी, आवास तथा जीविकोपार्जनसम्बन्धी खर्चलगायत सम्पूर्ण शैक्षिक आवश्यकताका लागि कर्जा उपलब्ध गराउने जनाएको छ।

बैंकका अनुसार प्रतिस्पर्धी ब्याजदरमा उपलब्ध हुने उक्त कर्जा योजनाअन्तर्गत आवश्यक कागजात पेश गरेपछि पाँच कार्यदिनभित्र कर्जा स्वीकृति प्रदान गरिनेछ। कर्जाको अधिकतम अवधि २५ वर्षसम्म रहनेछ भने अध्ययन अवधिसहित अधिकतम पाँच वर्षसम्म स्थगन अवधि राख्न सकिने व्यवस्था गरिएको छ।

धितोको आधारमा कर्जा सीमा निर्धारण गरिनेछ, जसअनुसार अचल सम्पत्तिको बजार मूल्यको अधिकतम ८० प्रतिशत, नगद वा मुद्दती निक्षेपको ९० प्रतिशत वा कुल शैक्षिक खर्चको १०० प्रतिशतसम्म कर्जा उपलब्ध गराइनेछ, जसमध्ये कम हुने रकम स्वीकृत हुनेछ। कर्जाको न्यूनतम सीमा दुई लाख रुपैयाँदेखि अधिकतम एक करोड रुपैयाँसम्म तोकिएको छ।

बैंकले कर्जा प्रक्रियासम्बन्धी सेवा शुल्क तथा अन्य शुल्कहरू प्रचलित शुल्क दरअनुसार लाग्ने जनाएको छ। यस योजनाले विद्यार्थीलाई उच्च शिक्षा हासिल गर्न आवश्यक आर्थिक पहुँच सहज बनाउने विश्वास बैंकले व्यक्त गरेको छ।अन्त्यमा, यस कर्जा सुविधामा लागू हुने सम्पूर्ण नियम तथा शर्तहरू बैंकद्वारा निर्धारण गरिएअनुसार लागू हुनेछन्।