रोहितलाई धन्यवाद दिँदै क्यानले भन्यो- एकपटकको लिडर सधैको लिडर

काठमाडौँ । नेपाल क्रिकेट संघ (क्यान) ले राष्ट्रिय पुरुष क्रिकेट टोलीका पूर्वकप्तान रोहित पौडेललाई उनको नेतृत्व र योगदानका लागि धन्यवाद दिएको छ। क्यानले रोहितको कप्तानीमा नेपाली टोलीले महत्वपूर्ण सफलता हात पारेको र नेपाली क्रिकेटमा सम्झनलायक क्षणहरू सिर्जना गरेको जनाएको छ। टोली, देश र क्रिकेटप्रति रोहितले देखाएको मेहनत र समर्पणको क्यानले प्रशंसा गरेको छ।

आगामी दिनमा पनि उनले नेपाली क्रिकेटका लागि योगदान दिइरहने विश्वास क्यानले व्यक्त गरेको छ। क्यानले आफ्नो सन्देशमा ‘एकपटकको लिडर सधैँ लिडर’ भन्दै रोहितको नेतृत्वको सम्मान गरेको छ। यसैबीच, क्यानले रोहितलाई एकदिवसीय टोलीको कप्तानीबाट हटाएर सन्दीप लामिछानेलाई नयाँ कप्तान बनाएको छ। यसअघि रोहितलाई टी–२० टोलीको कप्तानीबाट हटाएर दीपेन्द्र सिंह ऐरीलाई जिम्मेवारी दिइएको थियो।