हुथी आक्रमणमा साउदी अरबमा ७३ जना घाइते

काठमाडौं । यमनमा जारी द्वन्द्वका कारण साउदी अरबमा पछिल्लो समय आक्रमण बढेको छ। साउदी अरबको नेतृत्वमा रहेको सैन्य गठबन्धनका अनुसार इरान समर्थित हुथी विद्रोहीले गरेका आक्रमणमा कम्तीमा ७३ जना घाइते भएका छन्।

गठबन्धनले हुथीका आक्रमणको कडा जवाफ दिने चेतावनी दिएको छ। यमनको उत्तरी क्षेत्र र धेरै जनसंख्या भएको भागमा नियन्त्रण राख्दै आएका हुथीहरूले गत जुलाईमा साउदी अरबविरुद्ध समुद्री नाकाबन्दी गर्ने घोषणा गरेका थिए। त्यसपछि साउदी अरबलाई लक्षित गर्दै उनीहरूले आक्रमण बढाएका छन्।

हुथीहरूले लाल सागरमा रहेका साउदी अरबका व्यापारिक तथा अन्य जहाजलाई समेत निशाना बनाउँदै आएका छन्। साउदी नेतृत्वको गठबन्धनका प्रवक्ताले पछिल्लो अवस्था निकै खतरनाक भएको बताएका छन्।

उनका अनुसार हुथीहरूले साउदी अरबका सर्वसाधारण र महत्वपूर्ण आर्थिक संरचनालाई समेत निशाना बनाइरहेका छन्। पछिल्ला आक्रमणमा साउदी अरबको सरकारी तेल कम्पनी अरामकोको जिजानस्थित तेल प्रशोधन केन्द्र पनि लक्षित भएको बताइएको छ। तर अरामकोले यसबारे अहिलेसम्म आधिकारिक प्रतिक्रिया दिएको छैन।