काठमाडौं । देशका विभिन्न स्थानमा परेको अविरल वर्षाका कारण प्रमुख राजमार्गहरू अवरुद्ध हुँदा काठमाडौं उपत्यकाबाट बाहिरिने सार्वजनिक सवारीसाधन सञ्चालन प्रभावित भएका छन्। काठमाडौं जोड्ने राजमार्गहरूमा बाढी तथा पहिरोका कारण यातायात अवरुद्ध भएपछि विभिन्न गन्तव्यका लागि छुट्नुपर्ने सवारीसाधन काठमाडौंमै रोकिएका हुन्।
काठमाडौं उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेशराज सुवेदीका अनुसार पृथ्वी राजमार्ग र बीपी राजमार्गका विभिन्न स्थानमा पहिरो जाँदा सडक अवरुद्ध भएको छ। राजमार्ग अवरुद्ध भएपछि ती मार्ग हुँदै बाहिरिने सार्वजनिक बसहरू काठमाडौंमै रोकिएका छन्।
उनका अनुसार काठमाडौं–हेटौँडा आवतजावत गर्ने फर्पिङतर्फको सडक भने सञ्चालनमा रहेकाले साना सवारीसाधन आवतजावत गरिरहेका छन्। यद्यपि, प्रमुख राजमार्गमा देखिएको अवरोधका कारण लामो दूरीको सार्वजनिक यातायात भने प्रभावित भएको छ।
नयाँ बसपार्क सञ्चालन गर्दै आएको ल्होत्से बहुउद्देश्यीय प्रालिका महाप्रबन्धक पंकज मल्लले बिहीबार साँझदेखि गोङ्गबुस्थित नयाँ बसपार्कमा सार्वजनिक सवारीसाधन रोकिएको जानकारी दिए। उनका अनुसार बाढी तथा पहिरोका कारण देशका विभिन्न भागबाट काठमाडौं जोड्ने सडक अवरुद्ध भएपछि विभिन्न गन्तव्यतर्फ जाने अधिकांश सवारीसाधन नयाँ बसपार्कमै रोकिएका छन्।
यसैबीच, बिहीबार बिहानदेखि काठमाडौं उपत्यकामा निरन्तर वर्षा भइरहेको छ। लगातारको वर्षाका कारण उपत्यकाभित्रका नदी तथा खोलामा पानीको सतह बढ्न थालेपछि सम्भावित जोखिमलाई ध्यानमा राख्दै ट्राफिक प्रहरीले नदी करिडोर क्षेत्रमा सवारीसाधन नरोक्न तथा पार्किङ नगर्न आग्रह गरेको छ। ट्राफिक प्रहरीले माइकिङमार्फत समेत सर्वसाधारणलाई सचेत गराइरहेको छ।
भारी वर्षा र त्यसबाट राजमार्गमा पहिरो तथा अन्य अवरोध आउन सक्ने सम्भावनालाई ध्यानमा राख्दै नेपाल यातायात व्यवसायी राष्ट्रिय महासंघले पनि चालक तथा व्यवसायीलाई सावधानी अपनाउन आग्रह गरेको छ। महासंघका महासचिव डेकनाथ गौतमले सडकको अवस्था बुझेर तथा सुरक्षा निकायसँग आवश्यक समन्वय गरी मात्र सवारीसाधन सञ्चालन गर्न व्यवसायी र चालकलाई आग्रह गरेका छन्।
मौसम पूर्वानुमानअनुसार असोज ८ देखि १२ गतेसम्म देशका विभिन्न भागमा भारी वर्षाको सम्भावना रहेकाले विपद् तथा यातायातसम्बन्धी जोखिमलाई ध्यानमा राख्दै सतर्कता अपनाउन सम्बन्धित निकायले सर्वसाधारणलाई आग्रह गरेका छन्।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
