
काठमाडौं । नेपाल प्रिमियर लिग (एनपीएल) क्रिकेटको तेस्रो संस्करणअन्तर्गत फाइनलमा स्थान सुरक्षित गर्न आज लुम्बिनी लायन्स र सुदूरपश्चिम रोयल्सबीच पहिलो क्वालिफायरमा प्रतिस्पर्धा हुँदैछ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने खेल दिउँसो ४ः३० बजे सुरु हुनेछ। लिग चरणमा उत्कृष्ट प्रदर्शन गर्दै शीर्ष दुई स्थान हासिल गरेका दुवै टोली आजको खेल जितेर सिधै फाइनल प्रवेश गर्ने लक्ष्यसहित मैदान उत्रनेछन्।
लिग चरणमा दुवै टोलीले समान पाँच खेलमा जित निकालेका छन्। यद्यपि, सुदूरपश्चिमले दुई खेलमा पराजय बेहोरेको थियो। शीर्ष दुईमा रहँदै पहिलो क्वालिफायरमा स्थान बनाएका दुवै टोलीका लागि आजको खेल फाइनल पुग्ने पहिलो अवसरसमेत हो।
पहिलो क्वालिफायरमा विजयी हुने टोलीले सोझै फाइनलमा स्थान बनाउनेछ। पराजित हुने टोली भने प्रतियोगिताबाट बाहिरिने छैन। उसले दोस्रो क्वालिफायरमा प्रतिस्पर्धा गर्दै फाइनल प्रवेशको अर्को अवसर पाउनेछ।
त्यसैले आजको प्रतिस्पर्धा दुवै टोलीका लागि फाइनल पुग्ने अवसरका साथै उपाधि यात्रामा आफ्नो दाबेदारी बलियो बनाउने महत्वपूर्ण खेल हुनेछ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे