काठमाडौं। सरकारले देशभरका उत्कृष्ट शैक्षिक नतिजा हासिल गरेका तथा दुई हजारभन्दा बढी विद्यार्थी अध्ययनरत १०९ वटा सामुदायिक विद्यालयको भौतिक पूर्वाधार विस्तारका लागि ६ अर्ब ५४ करोड रुपैयाँ विनियोजन गरेको छ।
सामुदायिक विद्यालयप्रति विद्यार्थी तथा अभिभावकको बढ्दो आकर्षणलाई थप प्रोत्साहन गर्दै शैक्षिक गुणस्तर र सिकाइ वातावरण सुधार गर्ने उद्देश्यले सरकारले ठूला सामुदायिक विद्यालयको पूर्वाधार सुदृढीकरणलाई प्राथमिकतामा राखेको हो।
शिक्षा तथा खेलकुदमन्त्री सस्मित पोखरेलका अनुसार चालु आर्थिक वर्षमा विनियोजित बजेटमध्ये पहिलो चरणमा ८९ वटा विद्यालयका लागि पाँच अर्ब ३४ करोड रुपैयाँ निकासा भइसकेको छ। उक्त रकमबाट सम्बन्धित विद्यालयहरूमा आधुनिक सुविधासहितका नयाँ भवन निर्माणको प्रक्रिया अघि बढाइनेछ।
योजनाअन्तर्गत प्रत्येक विद्यालयमा करिब ६ करोड रुपैयाँ लागतमा १२ कोठाका तीनतले भवन निर्माण गरिनेछ। ती भवनमा आधुनिक कक्षाकोठा, व्यवस्थित प्रयोगशाला तथा पुस्तकालयको व्यवस्था गरिने मन्त्री पोखरेलले जानकारी दिएका छन्।
सरकारले विद्यार्थीको चाप बढी भएका सामुदायिक विद्यालयमा विद्यमान भौतिक संरचनाको अभाव समाधान गर्दै सुरक्षित, व्यवस्थित र प्रभावकारी शैक्षिक वातावरण निर्माण गर्ने लक्ष्य लिएको छ।
मन्त्री पोखरेलले केही सामुदायिक विद्यालयमा विद्यार्थीको अत्यधिक चाप रहे पनि अन्य विद्यालयहरू विद्यार्थी अभावको समस्याबाट गुज्रिरहेको उल्लेख गर्दै शैक्षिक संस्थाहरूबीच देखिएको असमानता न्यूनीकरण गर्न पूर्वाधार सुधारको कार्यक्रम अघि बढाइएको बताएका छन्।
उनका अनुसार तत्कालका लागि धेरै विद्यार्थी अध्ययनरत विद्यालयलाई प्राथमिकता दिइए पनि आगामी दिनमा देशभरका सबै सामुदायिक विद्यालयको भौतिक पूर्वाधार तथा शैक्षिक गुणस्तरमा समान सुधार ल्याउने सरकारको लक्ष्य छ।
सामुदायिक शिक्षाको रूपान्तरणका लागि पूर्वाधार विकास महत्त्वपूर्ण आधार भएको उल्लेख गर्दै मन्त्री पोखरेलले विद्यालयहरूबीचको स्रोतसाधन तथा शैक्षिक अवसरको असमानता अन्त्य गर्न सरकार प्रतिबद्ध रहेको बताएका छन्।
उनले सार्वजनिक शिक्षाको गुणस्तर अभिवृद्धिमा शिक्षक, अभिभावक, विद्यार्थी तथा सरोकारवाला निकायको साझा प्रयास आवश्यक रहेको उल्लेख गर्दै सामुदायिक विद्यालय सुधारको अभियानमा सबै पक्षलाई सहकार्य गर्न आह्वानसमेत गरेका छन्।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
