फागुन २१ पछिको संसद् बैठक सञ्चालनमा पूर्वाधार चुनौती

काठमाडौँ । आगामी फागुन २१ गते हुने प्रतिनिधि सभा निर्वाचनपछि बस्ने संसद् बैठक सञ्चालनका लागि आवश्यक पूर्वाधार अभाव देखिएको छ। सङ्घीय संसद् सचिवालयले बैठक सञ्चालनका लागि उपयुक्त सभा हल र आवश्यक संरचना व्यवस्थापन गरिदिन मुख्यसचिव समक्ष औपचारिक अनुरोध गरेको छ।

संसद् सचिवालयले सोमबार मुख्यसचिव सुमनराज अर्याललाई पत्र पठाउँदै निर्वाचनपछि तत्काल प्रतिनिधि सभा बैठक बसाल्न आवश्यक सभा हल, सचिवालयका पदाधिकारी तथा कर्मचारीका कार्यकक्ष, संसदीय दलका कार्यालय, साथै अडियो–भिडियो रेकर्डिङ, प्रत्यक्ष प्रसारण, श्रव्यदृश्य तथा सूचना प्रविधिसम्बन्धी उपकरणसहितको पूर्वाधार उपलब्ध गराइदिन आग्रह गरेको हो।

सहसचिव बबिता मिश्रद्वारा हस्ताक्षरित पत्रमा हाल संसद् सचिवालयसँग बैठक सञ्चालनका लागि आवश्यक भौतिक संरचना नरहेको उल्लेख गर्दै महासचिवस्तरको निर्णयअनुसार आवश्यक व्यवस्था मिलाइदिन अनुरोध गरिएको जनाइएको छ।

यसअघि संसदीय कामकारबाहीका लागि नयाँ बानेश्वरस्थित तत्कालीन अन्तर्राष्ट्रिय सम्मेलन केन्द्रलाई संसद् भवनका रूपमा प्रयोग गरिँदै आएको थियो। तर, गत भदौ २३ र २४ गते भएको ‘जेनजी आन्दोलन’का क्रममा उक्त भवनमा आगजनी र तोडफोड भएपछि सम्मेलन केन्द्र पूर्ण रूपमा क्षतिग्रस्त बनेको थियो। सो घटनापछि प्रतिनिधि सभा बैठक सञ्चालनका लागि वैकल्पिक स्थान अझै तय हुन सकेको छैन।