काठमाडौँ । भारी हिमपातका कारण माथिल्लो डोल्पामा फसेका ६ जना भारतीय पर्यटकको हेलिकोप्टरबाट सकुशल उद्धार गरिएको छ। उद्धार गरिएकामा तीन महिला र तीन पुरुष छन्। उनीहरू १४ कात्तिकदेखि सम्पर्कविहीन थिए। धो क्षेत्रबाट फोक्सुण्डो तालतर्फ फर्किने क्रममा नुमला र वाग्ला पास आसपासको क्षेत्रमा भारी हिमपात भएपछि फसेका थिए।
सोमबार बिहान हेलिकोप्टरमार्फत उनीहरूको उद्धार गरिएको हो। सुरुमा दुई महिलालाई उद्धार गरी सदरमुकाम दुनै ल्याइएको थियो। त्यसपछि बाँकी चार जनालाई पनि सुरक्षित रूपमा उद्धार गरिएको जिल्ला प्रशासन कार्यालयले जनाएको छ।
डोल्पाका प्रमुख जिल्ला अधिकारीका अनुसार सबै पर्यटकको स्वास्थ्य अवस्था सामान्य छ। प्रतिकूल मौसम र हेलिकोप्टर व्यवस्थापनमा समस्या हुँदा उद्धारमा ढिलाइ भएको थियो। प्रशासनले यसअघि नै पर्यटकलाई जोखिमपूर्ण हिमाली यात्रा नगर्न सुझाव दिएको थियो।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
