काठमाडौंका सबै निर्वाचन क्षेत्रमा मनोनयन दर्ताका लागि कार्यालय तयारी

काठमाडौं। आगामी फागुन २१ गते हुने प्रतिनिधिसभा सदस्य निर्वाचनको तयारीका क्रममा काठमाडौंका विभिन्न स्थानमा निर्वाचन कार्यालय स्थापना गरी आवश्यक काम–कारबाही सञ्चालनमा आएका छन्। जिल्ला निर्वाचन कार्यालय काठमाडौँका अनुसार काठमाडौंका सबै १० वटा निर्वाचन क्षेत्रमा कार्यालय स्थापना भइसकेका छन् र आज उम्मेदवारको मनोनयन दर्ता कार्यक्रम तय गरिएको छ।

कार्यालयका अनुसार काठमाडौं क्षेत्र नं. १ का लागि नयाँ बानेश्वरस्थित सहकारी प्रशिक्षण केन्द्रमा निर्वाचन कार्यालय सञ्चालन गरिएको छ। क्षेत्र नं. २ को कार्यालय कागेश्वरी मनोहरा नगरपालिकाको नगर भवनमा, क्षेत्र नं. ३ को कार्यालय गोकर्णेश्वर नगरपालिकाको वडा नं. ४ मा स्थापना गरिएको छ। त्यसैगरी, क्षेत्र नं. ४ का लागि बूढानीलकण्ठ नगरपालिकाको चपलीस्थित ज्येष्ठ नागरिक समाज भवनमा निर्वाचन कार्यालय तोकिएको छ।

यस्तै, क्षेत्र नं. ५ का लागि टोखा नगरपालिकाको श्री समाज भवन, क्षेत्र नं. ६ का लागि तारकेश्वर नगरपालिकाको धर्मस्थलीस्थित भवनमा निर्वाचन कार्यालय स्थापना गरिएको छ। क्षेत्र नं. ७ का लागि खुसीबु–बालाजुस्थित बहुउद्देश्यीय मार्सल आर्टस् केन्द्र (जुडो हल) मा कार्यालय सञ्चालनमा आएको छ।

त्यसैगरी, क्षेत्र नं. ८ को निर्वाचन कार्यालय नागार्जुन नगरपालिकाको नगरपालिका भवनमा, क्षेत्र नं. ९ को चन्द्रागिरि नगरपालिकाको भवनमा र क्षेत्र नं. १० का लागि कीर्तिपुर नगरपालिकाको वडा नं. २ बाघभैरवस्थित भवनमा निर्वाचन कार्यालय स्थापना गरिएको छ। जिल्ला निर्वाचन कार्यालयका अनुसार ललितपुर र भक्तपुरका पायक पर्ने स्थानमा पनि निर्वाचन कार्यालय स्थापना भई सञ्चालनमा आइसकेका छन्।