भारतीय विदेश सचिव विनय मोहन काठमाडौँमा

काठमाडौँ, १ फागुन । भारतीय विदेश सचिव विनय मोहन क्वात्रा काठमाडौं आइपुगेका छन्। दुई दिने नेपाल भ्रमणमका लागडी उनी आज (सोमवार) बिहान भारतीय वायु सेनाको विमानमार्फत त्रिभुवन अन्तर्राष्ट्रिय विमानस्थल हुँदै काठमाडौँ आइपुग्नुभएको हो ।

उहाँलाई त्रिभुवन विमानस्थलमा परराष्ट्र मन्त्रालयका सचिव भरतराज पौडेल, नेपालका लागि भारतीय राजदूत नविन श्रीवास्तव लगायतले स्वागत गरेका थिए ।

परराष्ट्र मन्त्रालयका सचिव भरतराज पौडेलको निमन्त्रणमा उनी दुईदिने नेपाल भ्रमणमा आएका हुन्। विदेश सचिव क्वात्राले प्रधानमन्त्री, राजनीतिक दलका प्रमुख, सरकारी उच्च अधिकारी लगायतसँग भेटघाट गर्ने कार्यक्रम रहेको छ ।

सचिव क्वात्रा आज नै नेपाल—भारत सचिवस्तरीय उच्चस्तरीय संयन्त्रको बैठकमा सहभागी हुनुहुनेछ ।
छलफलपछि परराष्ट्र सचिव पौडेलले उनको सम्मानमा आयोजित लञ्च कार्यक्रममा सहभागी हुनेछन्। लन्च पछि भारतीय विदेश सचिवले परराष्ट्र मन्त्री विमला राई पौड्यालसँग द्वि–पक्षीय भेटघाट गर्नेछन्।

प्रधानमन्त्री पुष्पकमल दाहाल प्रचण्डसँगको भेटमा भने भारतीय प्रधानमन्त्री नरेन्द्र मोदीले पठाएको निमन्त्रणा पत्र हस्तान्तरण गर्नेछन्। सोमवार नै नेकपा एमालेका अध्यक्ष केपी शर्मा ओलीसँग भेट्ने कार्यक्रम तय भएको छ।

विदेश सचिव क्ववत्राले मंगलवार भने नेपाली कांग्रेसका सभापति शेरबहादुर देउवालाई भेटघाट गर्नेछन्। मंगलवार राष्ट्रपति विद्यादेवी भण्डारीलाई भेट गरे पछि स्वदेश फर्कने कार्यक्रम रहेको छ ।