१९ औं वर्ष प्रवेशमा सिटी एक्सप्रेसद्वारा रक्तदान कार्यक्रम सम्पन्न

काठमाडौं । सिटी एक्सप्रेस मनि ट्रान्सफरले आफ्नो स्थापनाको १८ औं वर्ष पूरा गरी १९ औं वर्ष प्रवेशको अवसरमा विविध सामाजिक तथा संस्थागत गतिविधिमार्फत वार्षिकोत्सव मनाएको छ। कम्पनीले आइतबार राजधानीको कमलादीस्थित केन्द्रीय कार्यालय परिसरमा “रक्तदान जीवनदान – हामी सबैको योगदान” भन्ने मूल नारासहित रक्तदान कार्यक्रम सम्पन्न गरेको हो।

उक्त कार्यक्रम कम्पनीको सामाजिक उत्तरदायित्व अन्तर्गत सञ्चालन गरिएको हो, जसमा संस्थाका कर्मचारी, सेवाग्राही तथा सर्वसाधारणको उल्लेख्य सहभागिता रह्यो। कार्यक्रममा सिटी एक्सप्रेसका ब्राण्ड एम्बेसडर तथा चर्चित हास्य कलाकार जितु नेपालको विशेष उपस्थिति रहेको थियो। उनले आफ्नै उपस्थितिबाट कार्यक्रमलाई थप उत्साहजनक बनाएको आयोजकले जनाएको छ।

उक्त अवसरमा सिटी एक्सप्रेसले वर्षभर उत्कृष्ट कार्यसम्पादन गर्ने कर्मचारीहरूलाई सम्मान तथा पुरस्कार प्रदान गरेर उनीहरूको योगदानको कदर गरेको छ। संस्थाले यस्ता प्रोत्साहन कार्यक्रमले कर्मचारीहरूको मनोबल वृद्धि गर्न मद्दत गर्ने विश्वास व्यक्त गरेको छ।

नेपाल रेमिटेन्स क्षेत्रमा दुई दशक नजिकको अनुभव बोकेको सिटी एक्सप्रेस मनि ट्रान्सफरले हालै डिजिटल प्रविधिको उपयोग गर्दै ‘सिटी पे वालेट’ नामक अनलाइन भुक्तानी सेवा सुरु गरेको छ। यस सेवामार्फत ग्राहकले प्राप्त गरेको रेमिटेन्स रकमलाई मोबाइल एपमार्फत सहज रुपमा भुक्तानी गर्न सक्ने सुविधा प्राप्त गरेका छन्।

सिटी एक्सप्रेसले विगत १८ वर्षदेखि देश–विदेशमा सुरक्षित, छिटो र भरपर्दो विप्रेषण सेवा प्रदान गर्दै आएको छ। कम्पनीले रेमिटेन्स क्षेत्रको सुदृढीकरणमा आफ्नो योगदान निरन्तर जारी राख्ने र आगामी दिनमा अझ प्रभावकारी सेवा विस्तार गर्ने प्रतिबद्धता दोहोर्याएको छ।