लघुवित्त पीडितसँग वार्ता गर्न सरकारद्धारा समिति गठन

काठमाडौँ —  अर्थमन्त्री डा. स्वर्णिम वाग्लेले आन्दोलन गरिरहेका लघुवित्त पीडितसँग छलफल गरेर समस्या समाधान खोज्न वार्ता समिति गठन गरेका छन्। बिहीबार मन्त्रिस्तरीय निर्णयमार्फत बनेको यो समितिको नेतृत्व अर्थ मन्त्रालयका सहसचिव महेश आचार्यले गर्नेछन्। समितिमा कानुन मन्त्रालयका सहसचिव विनोदकुमार भट्टराई, गृह मन्त्रालयका सहसचिव सुरेश पन्थी र नेपाल राष्ट्र बैंकका कार्यकारी निर्देशक रामु पौडेल सदस्य छन्। अर्थ मन्त्रालयका उपसचिव बोलराज आचार्य सदस्य सचिव तोकिएका छन्।

अर्थमन्त्रीले समितिलाई आजैदेखि पीडितसँग वार्ता सुरु गर्न निर्देशन दिएका छन्। समितिको पहिलो बैठक अर्थ मन्त्रालयमा बस्नेछ र त्यसपछि आन्दोलनरत लघुवित्त पीडितका प्रतिनिधिसँग छलफल सुरु हुनेछ। सरकारले वार्तामार्फत पीडितका माग सुन्ने र समाधानका सम्भावना खोज्ने अपेक्षा गरिएको छ।