रास्वपा संसदीय दलको बैठकमा सरकारको कामबारे छलफल

काठमाडौं । राष्ट्रिय स्वतन्त्र पार्टी (रास्वपा)को संसदीय दलको बैठक आज सिंहदरबारमा सुरु भएको छ। बैठकमा पार्टीका सबै मन्त्री र सांसद सहभागी भएका छन्। पछिल्लो समय रास्वपाका केही सांसदले सरकारको काम गर्ने शैलीप्रति असन्तुष्टि जनाउँदै आएका थिए। यही विषयलाई ध्यानमा राख्दै पार्टी सभापति रवि लामिछानेले मन्त्री र सांसदलाई एकै ठाउँमा राखेर छलफल गर्न बैठक बोलाएका हुन्।

बैठकमा सरकारले अघि बढाइरहेको नीति तथा योजनाबारे छलफल हुने बताइएको छ। साथै, संसद्मा रास्वपाका सांसदहरूले कसरी प्रभावकारी भूमिका खेल्ने भन्ने विषयमा पनि कुराकानी हुनेछ।
सरकारका कामप्रति सांसदहरूले उठाउँदै आएका प्रश्न, गुनासा र असन्तुष्टिका विषयमा समेत बैठकमा छलफल हुने स्रोतले जनाएको छ। पार्टीभित्र देखिएका असमझदारी समाधान गर्ने र सरकारको कामलाई थप प्रभावकारी बनाउने उपायबारे पनि बैठकमा छलफल हुने अपेक्षा गरिएको छ।