सुदूरपश्चिमका मुख्यमन्त्री भट्टले विश्वासको मत लिँदै

काठमाडौँ । सुदूरपश्चिम प्रदेशका मुख्यमन्त्री खगराज भट्टले बुधबार प्रदेश सभाबाट विश्वासको मत लिँदैछन्। उनी मुख्यमन्त्री बनेको एक हप्तामै विश्वासको मत लिन लागेका हुन्।

यसअघि कमलबहादुर शाहले साउन २८ गते मुख्यमन्त्री पदबाट राजीनामा दिएपछि साउन २९ गते भट्ट मुख्यमन्त्री नियुक्त भएका थिए। कानुनअनुसार मुख्यमन्त्रीले नियुक्त भएको एक महिनाभित्र प्रदेश सभाबाट विश्वासको मत लिनुपर्छ।

विश्वासको मतका लागि बुधबार दिउँसो १ बजे प्रदेश सभा बैठक बस्नेछ। नेकपाको नेतृत्वमा बनेको नयाँ सरकारलाई एमालेले समर्थन गरेको छ। नेकपाका २१ र एमालेका ११ गरी ३२ सांसद छन्। सुदूरपश्चिममा बहुमतका लागि २७ सांसदको समर्थन आवश्यक पर्छ। त्यसैले भट्टले विश्वासको मत पाउने सम्भावना बलियो देखिएको छ।