भोटेकोशी बाढीपछि देवीघाटमा तुइन सञ्चालनमा

काठमाडौं । रसुवाको भोटेकोशी हुँदै आएको विनाशकारी बाढीका कारण त्रिशूली नदी वारिपारि आवतजावतमा समस्या भएपछि नुवाकोटको विदुर नगरपालिका–५ देवीघाटमा तुइन सञ्चालनमा ल्याइएको छ।

बागमती प्रदेशका मुख्यमन्त्री किरण थापा मगरका अनुसार प्रदेशको भौतिक पूर्वाधार मन्त्रालयअन्तर्गत पूर्वाधार विकास कार्यालय, नुवाकोटको सक्रियतामा देवीघाटमा तुइन जडान गरी सञ्चालनमा ल्याइएको हो। भदौ १० गते आएको बाढीले त्रिशूली नदी वारिपारि आवतजावतमा कठिनाइ उत्पन्न भएपछि स्थानीयको दैनिक आवतजावत सहज बनाउन तत्कालीन विकल्पका रूपमा तुइन सञ्चालन गरिएको हो।

तुइन सञ्चालनमा आएपछि स्थानीयवासीलाई त्रिशूली नदी वारिपारि आवतजावत गर्न सहज हुने मुख्यमन्त्री थापा मगरले बताए। यससँगै स्थानीय क्षेत्रमा खाद्यान्न, औषधिलगायत अत्यावश्यक सामग्रीको ढुवानीमा समेत सहजता हुने उनको भनाइ छ।

मुख्यमन्त्री थापा मगरले जनताको दैनिक जीवनमा प्रत्यक्ष प्रभाव पार्ने साना देखिए पनि महत्वपूर्ण पूर्वाधार निर्माणलाई प्रदेश सरकारले उच्च प्राथमिकतामा राखेको बताए। जनताको आवश्यकता जहाँ हुन्छ, प्रदेश सरकारको उपस्थिति त्यहीँ हुनुपर्ने प्रतिबद्धताका साथ सरकार अघि बढिरहेको उनले उल्लेख गरे।

उनले स्थानीयको आवश्यकता र सहजतालाई ध्यानमा राख्दै आवश्यकताअनुसार यस्ता अस्थायी तथा स्थायी पूर्वाधार निर्माण र सञ्चालनलाई प्रदेश सरकारले प्राथमिकतामा राख्ने बताए। विपद्का कारण प्रभावित नागरिकको आवतजावत तथा अत्यावश्यक सेवामा देखिएका समस्या समाधानका लागि प्रदेश सरकार निरन्तर सक्रिय रहने उनको भनाइ छ।