ट्राफिक व्यवस्थापनमा एआईसहित आधुनिक प्रविधि विस्तार गर्न आईजीपी कार्कीको जोड

काठमाडौँ। नेपाल प्रहरीका प्रहरी महानिरीक्षक (आईजीपी) दानबहादुर कार्कीले राजधानीको ट्राफिक व्यवस्थापनलाई प्रविधिमैत्री, वैज्ञानिक र प्रभावकारी बनाउन एआई-सक्षम सीसीटीभीलगायत आधुनिक प्रविधिको प्रयोग विस्तार गर्नुपर्ने बताएका छन्।

काठमाडौँ महानगर प्रहरी बलको ३४औँ वार्षिकोत्सवका अवसरमा आइतबार आयोजित कार्यक्रममा बोल्दै आईजीपी कार्कीले सवारीसाधनको बीचमा जोखिम मोलेर ट्राफिक प्रहरीले हात हल्लाउँदै सवारी व्यवस्थापन गर्नुपर्ने अवस्थाको अन्त्य हुनुपर्ने बताए। उनले ट्राफिक व्यवस्थापनलाई क्रमशः प्रविधिमा आधारित बनाउँदै लैजानुपर्नेमा जोड दिए।

उनका अनुसार एआई-सक्षम सीसीटीभीको विस्तारसँगै व्यवस्थित बस स्टप, बसपार्क र पार्किङ स्टेसन निर्माण तथा वैज्ञानिक पार्किङ प्रणालीको विकास आवश्यक छ। ट्राफिक व्यवस्थापनलाई सडकमा प्रहरीको प्रत्यक्ष उपस्थितिमा मात्र निर्भर नराखी आधुनिक प्रविधिको प्रयोगबाट थप सुरक्षित र प्रभावकारी बनाउनुपर्ने उनको भनाइ थियो।

आईजीपी कार्कीले ट्राफिक व्यवस्थापनसँगै फुटपाथ व्यवस्थापन तथा आपत्कालीन उद्धार र प्रतिकार्य प्रणालीलाई समेत व्यवस्थित बनाउन काठमाडौँ महानगरपालिका र सुरक्षा निकायबीच सहकार्य आवश्यक रहेको बताए।

राजधानीमा बढ्दो जनसंख्या, तीव्र सहरीकरण र सवारी चापका कारण सार्वजनिक स्थान व्यवस्थापन, फोहोरमैला, वातावरण संरक्षण, सम्पदा संरक्षण तथा विपद् व्यवस्थापनका चुनौती थप जटिल बन्दै गएको उनले उल्लेख गरे। यस्ता चुनौतीको दीर्घकालीन समाधानका लागि स्थानीय तह र नेपाल प्रहरीबीच निरन्तर समन्वय आवश्यक रहेको उनको भनाइ थियो।

आईजीपी कार्कीले देशभरका ७५३ वटै स्थानीय तहलाई नेपाल प्रहरीसँग सुरक्षा व्यवस्थापन तथा भौतिक पूर्वाधार निर्माणलगायतका विषयमा सहकार्य गर्न सम्बन्धित मन्त्रालयमार्फत पत्राचार भइरहेको जानकारी दिए।

उनले स्थानीय तहले आवश्यकता र प्राथमिकताका आधारमा प्रहरीका लागि जग्गा तथा भवन उपलब्ध गराउने, प्रहरी कार्यालय निर्माण तथा मर्मतमा सहयोग गर्ने, सवारीसाधन र विपद् उद्धार सामग्री उपलब्ध गराउने तथा सीसीटीभी जडान र विस्तारमा सहकार्य गर्नुपर्ने बताए।

यस्तो सहकार्यबाट नेपाल प्रहरी, महानगर प्रहरी र नागरिकबीचको समन्वय थप प्रभावकारी बन्ने उनले बताए। सुरक्षा व्यवस्थापनलाई स्थानीय आवश्यकतासँग जोडेर अघि बढाउन स्थानीय तहको भूमिका महत्वपूर्ण हुने उनको भनाइ थियो।

आईजीपी कार्कीले सडक तथा सार्वजनिक स्थान व्यवस्थापनमा काठमाडौँ महानगरपालिकाले गरिरहेको कामको प्रशंसा गर्दै स्वच्छ, सुरक्षित र अवरोधरहित सार्वजनिक स्थानमा हिँड्न पाउनु नागरिकको अधिकार भएको बताए। राजधानीको सहरी व्यवस्थापनमा महानगरपालिकाले गर्ने कामले समग्र सहरी व्यवस्थापनको अवस्थासमेत प्रतिबिम्बित गर्ने उनले उल्लेख गरे।

फोहोरमैला व्यवस्थापन पनि राजधानीको प्रमुख चुनौतीका रूपमा रहेको उल्लेख गर्दै उनले फोहोर उत्पादन हुने स्थानदेखि अन्तिम व्यवस्थापनस्थलसम्म प्रभावकारी व्यवस्थापन प्रणाली आवश्यक रहेको बताए। यसको दीर्घकालीन समाधानका लागि स्थानीय तह र सम्बन्धित सुरक्षा तथा प्रशासनिक निकायबीच समन्वय हुनुपर्नेमा उनले जोड दिए।

आगामी दिनमा महानगरपालिका र सुरक्षा निकायबीच योजनाबद्ध सहकार्यलाई थप विस्तार गर्दै ट्राफिक, फुटपाथ, पार्किङ तथा आपत्कालीन प्रतिकार्य प्रणालीलाई प्रविधिमैत्री र व्यवस्थित बनाउन संयुक्त रूपमा अघि बढ्नुपर्ने आईजीपी कार्कीले बताए।