बिहीबारदेखि लगातार वर्षाको जोखिम, लामो र रातिको यात्रा नगर्न आग्रह

काठमाडौं । पछिल्ला दिनमा लगातार वर्षा हुने सम्भावना रहेकाले यातायात व्यवसायीले सर्वसाधारणलाई यात्रा गर्दा विशेष सावधानी अपनाउन आग्रह गरेका छन्।

नेपाल राष्ट्रिय यातायात व्यवसायी महासंघले बिहीबारदेखि असोज १२ गतेसम्म लामो दूरीको यात्रा सकेसम्म नगर्न अनुरोध गरेको छ। अत्यावश्यक कामबाहेक टाढाको यात्रा नगर्न र रातिको समयमा यात्रा नगर्न पनि महासंघले आग्रह गरेको छ।

महासंघले आफ्ना सदस्य यातायात व्यवसायीलाई गाडी चलाउनुअघि सडकको अवस्था र मौसमबारे जानकारी लिन भनेको छ। वर्षाका कारण विभिन्न ठाउँमा सडकमा बाढी आउनुका साथै पहिरो जाने जोखिम बढेको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले पनि यसअघि नै यात्रामा सावधानी अपनाउन आग्रह गरिसकेको छ।

सरकारले यो साता धेरै ठाउँमा लगातार वर्षा हुन सक्ने भएकाले सबैलाई सुरक्षित रहन र अनावश्यक यात्रा नगर्न अनुरोध गरेको छ। यात्रा गर्नैपर्ने अवस्था भएमा मौसम र सडकको अवस्था बुझेर मात्र हिँड्न सुझाव दिइएको छ।