काठमाडौं । अमेरिकाले नेपालको बाढीपछिको प्रतिकार्य तथा पुनर्लाभ कार्यका लागि थप ३ करोड १० लाख अमेरिकी डलर सहयोग उपलब्ध गराउने घोषणा गरेको छ।
अमेरिकाका राजनीतिक मामिला हेर्ने उपविदेश मन्त्री एलिसन हुकरले आज न्युयोर्कमा नेपालका परराष्ट्र मन्त्री शिशिर खनालसँग भेटवार्ता गर्दै थप सहयोगको घोषणा गर्नुभएको हो। भेटका क्रममा उपविदेश मन्त्री हुकरले नेपालमा आएको विनाशकारी बाढीबाट प्रभावित नागरिक तथा हालसम्म बेपत्ता रहेका करिब ७० जना अमेरिकी नागरिकका परिवारप्रति अमेरिकाको सहानुभूति व्यक्त गर्नुभयो।
भेटवार्ताका क्रममा अमेरिकाले बाढी प्रभावित क्षेत्रमा यातायात पूर्वाधार पुनर्स्थापना गर्न एक करोड अमेरिकी डलरको कोष उपलब्ध गराउने योजना सार्वजनिक गरेको छ। उक्त रकम आवश्यक नापअनुसार निर्माण गरिने स्थायी पुलका लागि प्रयोग गरिनेछ। ती पुल अमेरिकी कम्पनीबाट खरिद गरिने र बाढी प्रभावित क्षेत्रमा यातायात पूर्वाधार पुनर्स्थापना गर्नुका साथै क्षेत्रीय सम्पर्क सञ्जाललाई सुदृढ बनाउन सहयोग पुग्ने अमेरिकी पक्षले जनाएको छ।
त्यस्तै, बाढी प्रभावित समुदायका लागि खानेपानी, सरसफाइ, आश्रय, सुरक्षा, जीविकोपार्जन तथा जाडोयाममा आवश्यक सहयोग उपलब्ध गराउन थप ८० लाख अमेरिकी डलर सहायता प्रदान गर्ने योजना पनि अमेरिकाले घोषणा गरेको छ।
विपद् पुनर्लाभ तथा भविष्यमा हुने विपद्को प्रतिकार्यलाई थप प्रभावकारी बनाउन अमेरिकामा निर्मित ड्रोन उपलब्ध गराउन थप एक करोड ३० लाख अमेरिकी डलर छुट्याउने योजना रहेको पनि अमेरिकी विदेश मन्त्रालयले जनाएको छ। यी प्रविधिको प्रयोग आगामी विपद्का समयमा खोज तथा उद्धार, क्षतिको मूल्याङ्कन र राहत व्यवस्थापनमा सहयोग पुर्याउने उद्देश्यले गरिने जनाइएको छ।
नयाँ सहयोग घोषणासँगै नेपालको बाढीसम्बन्धी प्रतिकार्य तथा पुनर्लाभ कार्यमा अमेरिकाको कुल सहयोग ३ करोड ६० लाख अमेरिकी डलरभन्दा बढी पुगेको छ। अमेरिकाले बाढीबाट सबैभन्दा बढी प्रभावित तथा सहयोगको आवश्यकता भएका क्षेत्र पहिचान गरी त्यहाँ प्रभावकारी रूपमा सहायता पुर्याउन नेपाल सरकारसँग निरन्तर समन्वय र सहकार्य गर्ने जनाएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
