कामना सेवा विकास बैंकद्वारा विद्यार्थीलाई वित्तीय साक्षरता र भविष्य निर्माणसम्बन्धी मार्गदर्शन

दमक । कामना सेवा विकास बैंक लिमिटेडले दमकस्थित सर्वोदय इङ्लिस बोर्डिङ सेकेन्डरी स्कुलका कक्षा ९ र १० मा अध्ययनरत करिब १५० विद्यार्थीलाई वित्तीय साक्षरता, जीवन उपयोगी सीप, लक्ष्य निर्धारण तथा भविष्य निर्माणसम्बन्धी मार्गदर्शन प्रदान गरेको छ।

विद्यालयको सर्वोदय बाल क्लबद्वारा आयोजित ‘सर्वोदय चौतारी’ अन्तर्गत ‘प्रेरक व्यक्तित्वसँग बालबालिका’ कार्यक्रममार्फत बैंकले विद्यार्थीलाई व्यवहारिक जीवनमा आवश्यक ज्ञान तथा सीपबारे अन्तरक्रियात्मक रूपमा जानकारी गराएको हो।

कार्यक्रमका प्रमुख अतिथि तथा कामना सेवा विकास बैंकका कोशी प्रदेश प्रमुख खिमलाल भुसालले विद्यार्थीलाई जीवन उपयोगी सीप, आत्मअनुशासन, निर्णय क्षमता, समय व्यवस्थापन तथा चुनौती सामना गर्ने तरिकाबारे जानकारी गराउनुभएको थियो। उहाँले शैक्षिक ज्ञानसँगै व्यवहारिक जीवनमा आवश्यक सीपको विकास पनि भविष्य निर्माणको महत्वपूर्ण आधार भएको बताउनुभयो।

त्यसैगरी, बैंकका ब्रान्डिङ, सीएसआर तथा मार्केटिङ प्रमुख सुशील पौडेलले लक्ष्य निर्धारण, भविष्यको दिशा र उचित मार्गदर्शनका विषयमा विद्यार्थीहरूसँग अन्तरक्रिया गर्नुभएको थियो। उहाँले विद्यार्थीलाई आफ्नो रुचि, क्षमता र प्राथमिकता पहिचान गरी स्पष्ट लक्ष्य निर्धारण गर्न तथा त्यसलाई चरणबद्ध योजनामा रूपान्तरण गर्न सुझाव दिनुभयो। निरन्तर सिकाइ, आत्ममूल्याङ्कन र अनुशासनमार्फत निर्धारित लक्ष्यतर्फ अघि बढ्न सकिने उहाँको भनाइ थियो।

कार्यक्रममा वित्तीय साक्षरताअन्तर्गत बचत तथा लगानीको आधारभूत ज्ञान, आवश्यकता र चाहनाबीचको भिन्नता, पैसाको योजनाबद्ध प्रयोग तथा जिम्मेवार आर्थिक व्यवहारका विषयमा पनि व्यवहारिक उदाहरणसहित छलफल गरिएको थियो। विद्यार्थी अवस्थादेखि नै आर्थिक निर्णयप्रति सचेत बन्ने बानीले भविष्यमा जिम्मेवार आर्थिक व्यवहार विकास गर्न सहयोग पुग्ने विषयमा जोड दिइएको थियो।

कार्यक्रममा व्यक्तिगत तथा व्यावसायिक विकासका लागि मार्गदर्शनको महत्वबारे समेत चर्चा गरिएको थियो। अनुभवी तथा विश्वासिलो व्यक्तिबाट समयमै मार्गदर्शन लिने, जिज्ञासा राख्ने, सुझाव ग्रहण गर्ने र सिकाइलाई व्यवहारमा उतार्ने अभ्यासले सही निर्णय लिन तथा निर्धारित लक्ष्यतर्फ अघि बढ्न सहयोग पुग्ने जानकारी विद्यार्थीलाई दिइएको थियो।

अन्तरक्रियाका क्रममा विद्यार्थीहरूले आफ्ना जिज्ञासा, भविष्यका योजना तथा करिअरसम्बन्धी सोच वक्ताहरूसँग राखेका थिए। कार्यक्रमले विद्यार्थीलाई पाठ्यपुस्तकमा सीमित ज्ञानभन्दा बाहिर वित्तीय सचेतना, व्यवहारिक जीवन सीप तथा भविष्यप्रति स्पष्ट दृष्टिकोण विकास गर्न सहयोग पुग्ने बैंकले जनाएको छ।

कामना सेवा विकास बैंकले वित्तीय साक्षरता तथा संस्थागत सामाजिक उत्तरदायित्वअन्तर्गत विभिन्न कार्यक्रम सञ्चालन गर्दै विद्यार्थी, युवा तथा समुदायमा वित्तीय चेतना, जिम्मेवार आर्थिक व्यवहार र जीवन उपयोगी सीपको विकासलाई प्रवद्र्धन गर्दै आएको जनाएको छ।