पहिरोले थुनिएको मर्स्याङ्दी नदी खोल्ने प्रयास जारी

काठमाडौँ । मनाङको चामेमा पहिरोका कारण थुनिएको मर्स्याङ्दी नदीको पानी खोल्न प्रशासनले ब्लास्ट गर्ने तयारी गरेको छ। पहिरो पन्छाउन मंगलबारदेखि दुईवटा डोजर प्रयोग भइरहेका छन्। लगातारको वर्षापछि ठाडो खोलामा आएको बाढी र पहिरोसँगै ठूलो मात्रामा ढुंगा र लेदो खसेपछि आइतबार मर्स्याङ्दी नदी थुनिएको थियो।

मर्स्याङ्दी नदीलाई ब्लास्ट गरेर खोल्ने प्रयास अझै सफल हुन सकेको छैन। नदी थुनिएको स्थानमा ब्लास्टका लागि आवश्यक ठूलो चट्टान फेला नपरेपछि नेपाली सेनाको प्राविधिक टोलीले काम अघि बढाउन नसकेको हो।

मनाङका सहायक प्रमुख जिल्ला अधिकारी कृष्णप्रसाद पौडेलका अनुसार पोखराबाट ब्लास्टका लागि आएको सेनाको प्राविधिक टोली सोमबार नै चामे पुगेको थियो। तर नदी थुनिएको आसपासको क्षेत्रमा ब्लास्ट गर्न उपयुक्त स्थान नपाएपछि तत्काल विस्फोट गराउने काम रोकिएको छ।

नदी थुनिएपछि चामे क्षेत्रमा पानी जमेर ताल बनेको छ। पानी बढ्दा मोटरेबल पुल, केही होटल र घरसमेत डुबानमा परेका छन्। जोखिम बढेपछि स्थानीय बासिन्दाले शनिबार रातिदेखि घर छाडेका थिए भने केहीले जंगलमा रात बिताएका थिए।

अहिले नदीको पानी केही बग्न थाले पनि निकास सहज छैन। त्यसैले प्रशासनले पहिरो हटाएर पानीको बहाव बढाउने र आवश्यक परे ठूलो ढुंगा फुटाउन ब्लास्ट गर्ने तयारी गरेको छ।