
काठमाडौं । जलवायु परिवर्तनका कारण उत्पन्न हुने क्षति तथा जोखिम व्यवस्थापनका लागि राष्ट्रिय रणनीतिक योजना तयार गर्न नेपालले सान्टियागो नेटवर्कबाट प्राविधिक सहयोग पाउने भएको छ।
जलवायु परिवर्तनबाट हुने हानि तथा नोक्सानी र हिमताल विस्फोटबाट आउने बाढी (ग्लोफ) को जोखिम व्यवस्थापनका लागि आवश्यक राष्ट्रिय रणनीति निर्माण गर्न उक्त सहयोग उपलब्ध हुन लागेको हो।
नेपाल र हानि तथा नोक्सानीसम्बन्धी सान्टियागो नेटवर्क (एसएनएलडी) बीचको साझेदारी औपचारिक रूपमा घोषणा गरिएको छ। टर्कीको अन्टाल्यामा जारी संयुक्त राष्ट्रसंघीय जलवायु परिवर्तन सम्मेलन (कोप–३१) का क्रममा उक्त साझेदारी घोषणा गरिएको हो।
यस साझेदारीअन्तर्गत नेपालले जलवायु परिवर्तनका कारण निम्तिने विपद्, आर्थिक तथा भौतिक क्षति र हिमताल विस्फोटबाट उत्पन्न हुने जोखिमको पहिचान, मूल्याङ्कन तथा व्यवस्थापनका लागि प्राविधिक सहायता प्राप्त गर्नेछ।
जलवायु परिवर्तनका प्रभावबाट बढी जोखिममा रहेका मुलुकमध्ये नेपाल पनि एक हो। विशेषगरी हिमाली क्षेत्रमा तापक्रम वृद्धि, हिमनदी पग्लिने क्रम र हिमतालको विस्तारका कारण हिमताल विस्फोटबाट बाढी आउने जोखिम बढ्दै गएको छ। यस्तो जोखिम न्यूनीकरण तथा सम्भावित क्षतिको व्यवस्थापनका लागि राष्ट्रियस्तरको रणनीति निर्माणमा सान्टियागो नेटवर्कको सहयोग महत्त्वपूर्ण हुने अपेक्षा गरिएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे