वैकल्पिक उपचार क्षेत्र सञ्चालनका लागि निर्देशिका मस्यौदा अन्तिम चरणमा

धुलिखेल — विपद् वा जनस्वास्थ्य आपतकालिन अवस्थामा अस्पतालबाहिर प्रभावकारी स्वास्थ्य सेवा उपलब्ध गराउन वैकल्पिक उपचार क्षेत्र (Alternate Care Site) सञ्चालनका लागि निर्देशिकाको मस्यौदा अन्तिम रूप दिन आज धुलिखेलमा कार्यशाला सुरु भएको छ। स्वास्थ्य तथा जनसंख्या मन्त्रालयको आयोजनामा यस कार्यशालाको उद्घाटन सम्पन्न भएको हो।

यस कार्यक्रमलाई विश्व स्वास्थ्य संगठन (WHO) को प्राविधिक तथा ECHO EU को आर्थिक सहयोग प्राप्त छ। सातवटै प्रदेशबाट लिइएका सुझावहरूको आधारमा तयार पारिएको निर्देशिका मस्यौदालाई अन्तिम रूप दिन यो कार्यशाला आयोजना गरिएको हो।

कार्यक्रममा उपस्थित स्वास्थ्य मन्त्रालयका एक उच्चपदस्थ अधिकारीले “जनस्वास्थ्य आपतकालिन परिस्थितिमा वैकल्पिक उपचार क्षेत्रहरू प्रभावकारी ढंगले सञ्चालन गर्न यो निर्देशिका महत्त्वपूर्ण भूमिका खेल्नेछ” भने।

यस अवसरमा प्रदेशस्तरीय स्वास्थ्य प्रतिनिधिहरू, अन्तर्राष्ट्रिय सहयोगी संस्थाका प्रतिनिधि तथा स्वास्थ्य विशेषज्ञहरू उपस्थित रहेका छन्। निर्देशिका अन्तिम रूप दिइसँगै यसले देशभर आपतकालीन स्वास्थ्य सेवा प्रबन्धनमा ठूलो योगदान पुर्याउने अपेक्षा गरिएको छ।