नेपाल एसबीआई बैंक हायुटार शाखामा लुटेरा समूहको आक्रमण,लुटिएको रकममध्ये दुई बोरा पैसा बरामद

रामेछाप । सिन्धुली जिल्लाको घ्याङलेख गाउँपालिका–हायुटारस्थित नेपाल एसबीआई बैंक शाखामा सशस्त्र लुटपाट भएको छ। मंगलबार साँझ हतियारसहित बैंकमा प्रवेश गरेका लुटेरा समूहले सुरक्षागार्ड र कर्मचारीलाई नियन्त्रणमा लिएर करिब ३ करोड ७ लाख रुपैयाँ लुटेर फरार भएको प्रहरीले जनाएको छ।

प्रहरीका अनुसार बनेपातर्फबाट आएको टाटा सुमोमा आएका करिब पाँच जना नकाबधारी लुटेराले बैंकभित्र प्रवेश गरी सुरक्षागार्डलाई बाँधेका थिए। उनीहरूले पेस्तोल देखाएर खुकुरी प्रहार गर्दा सुरक्षागार्ड घाइते भएको प्रारम्भिक अनुसन्धानबाट खुलेको छ।

लुटपाटपछि स्थानीयवासी र प्रहरीको संयुक्त प्रयासमा घटनामा प्रयोग गरिएको बा ३ डी ०३९८ नम्बरको इम्बोस्ड नम्बर प्लेट भएको टाटा सुमो र त्यसका चालकलाई नियन्त्रणमा लिइएको छ। उक्त सवारीसाधन घ्याङलेख गाउँपालिका–१ अन्तर्गत पर्ने टुनी भञ्ज्याङ क्षेत्रबाट फेला परेको वडा अध्यक्ष रोशन भ्लोनले जानकारी दिनुभयो।

वडा अध्यक्ष भ्लोनका अनुसार लुटिएको रकममध्ये दुई बोरा पैसा बरामद गरिएको छ। तर हालसम्म बरामद रकमको यकिन विवरण सार्वजनिक गरिएको छैन। बरामद सवारीसाधन र रकम इलाका प्रहरी कार्यालय बस्तिपुरमा राखिएको छ।

लुटपाटमा संलग्न अन्य व्यक्ति भने जंगलतर्फ फरार रहेकाले उनीहरूको खोजीका लागि व्यापक खोजतलास अभियान सञ्चालन भइरहेको प्रहरीले जनाएको छ। हतियारसहित बैंकमा प्रवेश गरी कर्मचारी तथा सुरक्षागार्डको हातखुट्टा बाँधेर गरिएको यस घटनाबारे थप अनुसन्धान जारी रहेको प्रहरीको भनाइ छ।