सहिदको सपना पूरा गर्न नयाँ पुस्तासँगै अघि बढ्न सरकारको आग्रह

काठमाडौं । प्रधानमन्त्री तथा मन्त्रिपरिषद्को कार्यालयले सहिद दिवसको अवसरमा देशवासीलाई शुभकामना दिएको छ।

मंगलबार जारी गरिएको शुभकामना सन्देशमा नेपालका सहिदहरूले देशमा परिवर्तन ल्याउन पुर्‍याएको योगदानको प्रशंसा गरिएको छ। उनीहरूले नयाँ सोच, प्रविधि, नवप्रवर्तन र समाज परिवर्तनको बाटो देखाएको कार्यालयले जनाएको छ।

सरकारले सहिदहरूको योगदान र बलिदानलाई सम्झँदै उनीहरूले देखाएको बाटोमा अघि बढ्न सबैलाई आग्रह गरेको छ। सहिदहरूले देश र जनताको राम्रो भविष्यका लागि गरेको त्यागलाई सम्मान गर्दै नयाँ पुस्ताको सोच र चाहनालाई पनि महत्व दिनुपर्ने सन्देशमा उल्लेख छ।

सरकारका अनुसार पुरानो पुस्ताको अनुभव र नयाँ पुस्ताको ऊर्जा तथा नयाँ सोचलाई जोडेर देशलाई अघि बढाउन आवश्यक छ। त्यसका लागि सबै नागरिक मिलेर निष्पक्ष, पारदर्शी र अवसरले भरिएको नेपाल निर्माणमा योगदान दिनुपर्ने बताइएको छ।

सहिद दिवसले सबैलाई देशप्रति जिम्मेवार बन्न, सकारात्मक परिवर्तनका लागि काम गर्न र सहिदहरूले देखाएको सपना पूरा गर्ने दिशामा अघि बढ्न प्रेरणा मिलोस् भन्ने शुभकामना सन्देशमा व्यक्त गरिएको छ।