चलिरहेको मोटरसाइकलमा उभिएर भिडियो बनाएको भन्दै सांसद बब्लु गुप्ताको आलोचना

काठमाडौँ । सिरहा क्षेत्र नं. १ का रास्वपा सांसद बब्लु गुप्ता गुडिरहेको मोटरसाइकलमा उभिएर भिडियो बनाएको दृश्य सामाजिक सञ्जालमा भाइरल भएको छ। उनका साथी रहिश खानको टिकटक खाताबाट सार्वजनिक भएको भिडियोमा गुप्ता मोटरसाइकलको पछाडि उभिएको देखिन्छ। भिडियोमा उनीहरू घुमघाममा गएको उल्लेख गरिएको छ।

सरकारले पछिल्लो समय ट्राफिक नियम कडाइका साथ लागू गरिरहेका बेला सांसदबाटै नियम उल्लङ्घन भएको भन्दै सामाजिक सञ्जालमा आलोचना भइरहेको छ। उक्त घटना लहान नगरपालिका–१६ तरेगनाबाट काभ्रे महादेव मन्दिर जाने क्रममा भएको बताइएको छ। घटनाबारे सांसद गुप्ता वा सम्बन्धित निकायले भने अहिलेसम्म औपचारिक प्रतिक्रिया दिएका छैनन्।