चामलदेखि ग्याससम्मको मूल्यवृद्धिप्रति सांसद केसीको आपत्ति

काठमाडौं । नेपाली कांग्रेसका सांसद अर्जुननरसिंह केसीले दैनिक उपभोग्य सामानको मूल्य अस्वाभाविक रूपमा बढेको भन्दै सरकारको ध्यानाकर्षण गराएका छन्। बुधबार प्रतिनिधिसभाको बैठकमा बोल्दै उनले संकटको अवस्थालाई केही व्यवसायीले बढी नाफा कमाउने अवसर बनाएको आरोप लगाए।

उनका अनुसार पछिल्लो समय चामलको मूल्य प्रतिबोरा २ हजार ७ सय रुपैयाँ, सूर्यमुखी तेल ३ सय रुपैयाँ, तोरीको तेल ४ सय ४० रुपैयाँ र खसीको मासु १ हजार ७ सय रुपैयाँसम्म पुगेको छ। अण्डाको मूल्य पनि प्रतिगोटा २५ रुपैयाँ पुगेको उनले बताए। सागपात र फलफूलको मूल्य बढ्दा सर्वसाधारणलाई दैनिक खर्च चलाउन कठिन भएको उनको भनाइ छ।

सांसद केसीले पछिल्लो चार महिनामा मूल्यवृद्धि ४.५६ प्रतिशत पुगेको उल्लेख गर्दै बजार अनुगमन प्रभावकारी नभएको बताए। उनले काठमाडौं उपत्यकामा दैनिक करिब ४० हजार ग्यास सिलिन्डर आवश्यक पर्ने भए पनि आधाभन्दा कम आपूर्ति भइरहेको दाबी गरे।

ग्यासका लागि लामो समय लाइन बस्नुपर्ने अवस्था रहेको तर कालोबजारमा प्रतिसिलिन्डर २ हजार ६ सय रुपैयाँसम्ममा सजिलै पाइने गरेको उनले बताए। उनले महँगी र कालोबजारी नियन्त्रण गरी जनतालाई राहत दिन सरकार गम्भीर हुनुपर्ने माग गरे।