निगमको २३ स्थानमा जग्गा तथा भवन, सिनामङ्गलको ३४ रोपनी जग्गा पनि उपयोगविहीन

काठमाडौं । नेपाल वायुसेवा निगमको स्वामित्वमा विभिन्न २३ स्थानमा रहेका जग्गा तथा भवनमध्ये बैतडीस्थित जग्गाको स्वामित्वसम्बन्धी आवश्यक कागजात उपलब्ध नभएको पाइएको छ। निगमको आर्थिक विनियमावली, २०६५ ले आफ्नो स्वामित्वमा रहेका घरजग्गाको लगत अद्यावधिक गरी लालपुर्जासहितको विवरण केन्द्रीय अभिलेखका रूपमा प्रधान कार्यालयको सम्पत्ति व्यवस्थापन महाशाखामा राख्नुपर्ने व्यवस्था गरेको छ।

तर, बैतडीमा रहेको निगमको जग्गाको स्वामित्व पुष्टि गर्ने आवश्यक कागजात नै नरहेको देखिएको हो। त्यस्तै, सिनामङ्गलस्थित निगमको ३४ रोपनी १३ आना १ पैसा २ दाम जग्गालाई निगमको उद्देश्यअनुकूल उपयोग गर्नुपर्ने विषयमा अघिल्लो वर्षसमेत सुझाव दिइएको भए पनि हालसम्म त्यसको अवस्था यथावत् रहेको उल्लेख गरिएको छ।

सम्बन्धित निकायले निगमको स्वामित्वमा रहेका सम्पूर्ण जग्गा तथा भवनको स्वामित्वसम्बन्धी अभिलेख पूर्ण र अद्यावधिक राख्नुका साथै उपयोगविहीन सम्पत्तिको उचित व्यवस्थापन र निगमको उद्देश्यअनुकूल प्रभावकारी उपयोग सुनिश्चित गर्नुपर्ने देखिएको छ।