सूर्यदर्शन सहकारी प्रकरण :आजबाट लामिछानेसहित प्रतिवादीतर्फका वकिलहरूले बहस गर्ने

काठमाडौँ , १८ पुस । आज राष्ट्रिय स्वतन्त्र पार्टीका सभापति रवि लामिछानेसहित ७ जनाविरूद्ध कास्की अदालतमा थुनछेक बहस जारी रहनेछ। कास्की जिल्ला अदालतमा जारी थुनछेक बहसमा सरकारी वकिलको तर्फबाट बुधबार बहस सकिएकाले आजदेखि जाहेरवालाको तर्फबाट बहस हुन लागेको हो । मंगलबार सरकारको पक्षबाट दुई जना वकिलले सात जना प्रतिवादीहरूमाथि बहस गरेका थिए।

जाहेरीवालाको तर्फबाट भने १२ जनाले बहस गर्ने अदालत प्रशासनले जनाएको छ। जाहेरवालाको बहसपछि भने प्रतिवादीको तर्फबाट बहस हुने छ। सहकारी ठगी प्रकरणमा मुछिएकाको बयान सकिएसँगै कारागार बसेर मुद्दा लड्ने कि तारेख वा धरौटीमा छुटेर मुद्दा लड्न दिने भनेर पुस १६ गतेदेखि कास्की अदालतमा थुनछेक बहस जारी छ। सरकारी वकिलको कार्यालय, कास्कीले लामिछाने, छविलाल जोशीसहित ४४ जनालाई आइतबार सहकारी ठगीको आरोपमा प्रतिवादी बनाएर मुद्दा दर्ता गरेको छ ।

सोही अभियोगमा ५ जनालाई बिगो अनुसारको सम्पत्ति जफत गर्ने प्रयोजनका लागि मात्र प्रतिवादी कायम गरिएको छ । लामिछानेविरुद्ध भने सङ्गठित अपराध, सहकारी ठगी र सम्पत्ति शुद्धीकरण सम्बन्धी कसुरमा अभियोग पत्र दर्ता गरिएको छ ।