नेपाल बीमा प्राधिकरण अध्यक्ष पदका लागि १४ जनाको आवेदन

काठमाडौँ — बीमा कम्पनीहरूको नियामक संस्था नेपाल बीमा प्राधिकरणको अध्यक्ष पदमा नियुक्तिका लागि १४ जनाले आवेदन दिएका छन्। प्राधिकरणका तत्कालीन अध्यक्ष शरद ओझा बर्खास्त भएपछि अर्थ मन्त्रालयले नयाँ अध्यक्ष नियुक्त गर्नका लागि सात दिने सूचना प्रकाशित गरेको थियो। सोही सूचनाअनुसार विभिन्न जिल्लाबाट योग्य व्यक्तिहरूले आवेदन दिएका हुन्।

अर्थ मन्त्रालयका अनुसार आवेदन दिने व्यक्तिहरूमध्ये ललितपुरका घनश्याम बुढाथोकी, काठमाडौंका बिक्रान्त पाण्डे, बिष्णुबाबु मिश्र, बुद्धकाजी श्रेष्ठ, चिन्तामणी शिवाकोटी, डा. राजेन्द्र पण्डित र रमेशकुमार भट्टराई रहेका छन्।

यस्तै भक्तपुरका पारस काफ्ले र महेश्वर न्यौपाने, कास्कीका डा. दामोदर बसौंला, झापाका ज्ञानेन्द्र अधिकारी, मोरङका देवकुमार ढकाल, लम्जुङका प्रा. डा. दिपकबहादुर  र दाङका यज्ञप्रसाद न्यौपानेले पनि आवेदन दर्ता गराएका छन्।

अध्यक्ष पदका लागि आवेदन दिएका उम्मेदवारहरूको नामावली प्राधिकरणको सञ्चालक समितिको अध्यक्ष नियुक्तिका लागि गठन गरिएको सिफारिस समितिले सार्वजनिक गरेको हो। यसपछि छनोट प्रक्रिया अघि बढ्नेछ र अन्ततः योग्य उम्मेदवारको नाम मन्त्रिपरिषद् समक्ष सिफारिस गरिने अपेक्षा गरिएको छ।

नेपाल बीमा प्राधिकरणको अध्यक्ष पदलाई बीमा क्षेत्रको नेतृत्व गर्ने जिम्मेवारीका हिसाबले महत्त्वपूर्ण मानिन्छ। बीमा कम्पनीहरूको नियमन, बीमितको हित संरक्षण र वित्तीय क्षेत्रमा पारदर्शिता ल्याउने कार्यमा अध्यक्षको भूमिका निर्णायक हुने भएकाले यसपटकको नियुक्ति चर्चाको विषय बनेको छ।

विशेषज्ञहरूको भनाइमा, बीमा बजारलाई व्यवस्थित गर्न, अवैध क्यासब्याकजस्ता अभ्यास रोक्न र ग्राहकमैत्री वातावरण बनाउन सक्षम नेतृत्व आवश्यक छ। नयाँ अध्यक्षले संस्थागत सुधारसँगै बीमा कम्पनीहरूको विश्वसनीयता र पारदर्शिता सुनिश्चित गर्न चुनौतीपूर्ण भूमिका निर्वाह गर्नुपर्ने देखिन्छ।

अर्थ मन्त्रालयले आवेदन दिएका व्यक्तिहरूमध्ये योग्य उम्मेदवारलाई छनोट गरी आगामी बैठकमा अन्तिम नामावली सार्वजनिक गर्ने तयारी गरेको छ। यससँगै बीमा क्षेत्रको नेतृत्व कसले गर्ने भन्ने प्रश्नमा सबैको ध्यान केन्द्रित भएको छ।