प्रमुख स्वकीय सचिवबारे उठेको प्रश्नमा सचिवालयले भन्यो ,कर्मचारी नियुक्ति कानुनसम्मत छ

काठमाडौँ । प्रधानमन्त्री सुशीला कार्कीको प्रमुख स्वकीय सचिव आदर्श श्रेष्ठबारे उठेका प्रश्नलाई लिएर प्रधानमन्त्री कार्यालयले स्पष्टीकरण दिएको छ। कार्यालयले प्रमुख स्वकीय सचिवालयका कर्मचारी नियुक्ति सम्बन्धी गलत प्रचारप्रति गम्भीर ध्यानाकर्षण भएको जनाएको छ। प्रेस संयोजक रामबहादुर रावलका अनुसार, प्रधानमन्त्री कार्की सधैं मितव्ययिता, पारदर्शिता र जवाफदेहितामा संवेदनशील रहँदै आएको र सचिवालय अत्यन्त न्यून जनशक्तिबाट सञ्चालन भइरहेको छ।

सचिवालयको स्पष्टीकरणमा भनिएको छ, प्रमुख स्वकीय सचिव पदमा नियुक्ति प्रधानमन्त्रीले गर्ने व्यवस्था रहेको र अन्य कर्मचारीहरू सचिवको सिफारिसमा नियुक्त हुने नियम अनुसार नियुक्ति गरिएको हो। कतै थर वा जातीय पृष्ठभूमि मिलेकै आधारमा जबरजस्ती नातेदार भनी प्रचार गर्नु गलत रहेको पनि विज्ञप्तिमा उल्लेख छ।

प्रधानमन्त्रीको निवासमा नजिकबाट काम गर्नुपर्ने र चौबीसै घण्टा उपलब्ध रहनुपर्ने कर्मचारी चयन गर्दा सुरक्षाको दृष्टिले भरपर्दो र विश्वासिलो व्यक्ति नियुक्त गरिएको बताइएको छ। वर्तमानमा सात सल्लाहकारमध्ये दुई मात्र नियुक्त छन् भने १९ दरबन्दीमध्ये चार जना मात्र विज्ञ कर्मचारी कार्यरत छन्। ४१ दरबन्दी भएको स्वकीय सचिवालयमा हाल १४ मात्र कर्मचारी काम गरिरहेका छन् र कुल ६७ दरबन्दीमध्ये २० जनाको मात्र सचिवालय गठन भएको विज्ञप्तिमा उल्लेख छ।